Itoobiya oo abaalmarin duldhigtay hogaanka TPLF
-
WARIYAHA ADDIS ABABA GAROWE ONLINE
- Posted On 19-12-2020, 04:08AM
ADDIS ABABA, Ethiopia – Dowlada Itoobiya ayaa abaalmarin lacageed oo dhan tobban milyan lacagta waddankaas ah una dhiganta $260,000 waxay dul-dhigtay hogaanka baxsadka ah ee xoogaga TPLF.
Xukuumadda Addis Ababa ayaa shaaca ka dhigtey in lacagtaas ay siin doonto cid kasta oo keenta maclumaad lagu soo qaban karo ama muujinaya meesha ay ku dhuumaaleysanayaan saraakiisha jabhadda.
Telefishinka ku hadla afka dowladda Itoobiya iyo Guddiga loo xilsaarey xaaladda gobolkaas ayaa faafiyey wararkaas Jimcaddii.
Hogaamiyeyaasha TPLF ayaa loo maleynayaan in ay ku hareereysan yihiin buuraleyda gobolkas tan iyo markii ay waayaan gacan ku haynta magaalada caasimadda ah ee Maqale 23-kii November.
Tan iyo markii laga saarey magaala madaxda, ma jirto wax wareysi ah oo ay siiyeen warbaahinta caalamiga oo ay la hadli jireen kahor inta aan laga saarey magaala madaxda gobolkan waqoyga dhaca.
Xaalada gobolka Tigray ayaa haatan ah mid degan. Nolosha waxay kusoo laabaneysaa si caadi ah. Maamul ku meelgaar ah ayaana loo dhisay kaasoo soo celiyey isgaarsiinta iyo adeeggii internet-ka.
GAROWE ONLINE
