Kenya oo feejignaan sare ku jirta kadib markii cudurka Ebola ka dilaacay Uganda

NAIROBI, Kenya - Wasaaradda Caafimaadka ee Kenya ayaa Jimcihii shaacisay inay xoojisay kormeerka dhammaan goobaha laga galo dalka kadib markii cudurka Ebola ee nooca Sudan uu ka dillaacay dalka dariska la ah ee Uganda.

Mary Muthoni, oo ah Xoghayaha Guud ee Wasaaradda Caafimaadka ee Kenya, ayaa soo saartay war-saxaafadeed ay ku sheegtay in nidaamyada kormeerka ee dhammaan degmooyinka iyo goobaha laga galo dalka la xoojiyey, iyadoo lagu talinayo tallaabooyin taxaddar ah.

Muthoni ayaa sidoo kale sheegtay in la sameynayo qiimeyn degdeg ah oo lagu ogaanayo awoodda dalka ee ka jawaabista cudur la mid ah, taasoo kadib loo sameyn doono qorshe dhamaystiran oo hagaya diyaarinta iyo ka jawaabista Ebola ee dalka oo dhan.

Waxay sidoo kale bulshada ku boorisay inay ka helaan macluumaad sax ah oo ka imanaya shaqaalaha caafimaadka ee aqoonta u leh, xoojiyeyaasha caafimaadka bulshada, ama Wasaaradda Caafimaadka iyada oo loo marayo website-keeda.

Qoraalka ayaa yimid ka dib markii Wasaaradda Caafimaadka ee Uganda Khamiistii shaacisay in cudurka Ebola uu ka dillaacay kadib geerida kalkaaliye ninkeeda 32 jir ah oo u geeriyooday cudurka Ebola ee nooca Sudan, taasoo noqotay faafida toddobaad ee cudurka ee dalkaas.

Hay'adda Caafimaadka Adduunka (WHO) ayaa sheegtay inay si dhow ula shaqeyneyso hay'adaha caafimaadka ee Uganda si loo soo celiyo nidaam adag oo kormeer iyo maaraynta kiisaska, dhaqdhaqaaq bulshada iyo isgaarsiinta khatarta ee ka jawaabista faafida cudurka.

Cudurka Ebola wuxuu si fudud ugu faafi karaa dadka wuxuuna sababi karaa calaamado kala duwan sida qandho, madax xanuun, shuban, matag iyo daal.

WHO ayaa sheegtay in heerka dhimashada ee dadka qaata cudurka Ebola uu u dhexeeyo 50% ilaa 89%, iyadoo ku xiran noocyada fayraska.

GAROWE ONLINE