Madaxweynaha Tanzania Samia Suluhu oo Xilka loo dhaariyey kadib Doorasho Lagu Murmay 

Dodoma, Tanzania – Madaxweynaha Tanzania, Samia Suluhu Hassan, ayaa Isniinta Maanta ah loo dhaariyey xilkeeda labaad, kadib markii ay ku guuleysatay doorasho muran dhalisay oo kicisay dibadbaxyo dhiig ku daatay dalka oo dhan.

Samia ayaa u dhaaratay xilka intii lagu guda jiray xaflad ka dhacday saldhig milateri oo ku yaalla caasimadda Dodoma, iyadoo dadweynaha laga xiray xafladda sababo la xiriira rabshadaha ka dhashay codbixinta. Labada musharax ee ugu waaweynaa mucaaradka ayaa ka hor istaagtay tartanka doorashada.

Waxaa lagu dhawaaqay in Hassan ay heshay ku dhawaad 98% codadka, iyada oo ka tartantay kaliya musharaxiinta xisbiyada yar-yar ee mucaaradka. Telefishanka dowladda ayaa muujiyay saraakiil iyo marti sharaf shisheeye oo ka daawanaya xafladda barxad lagu sameeyay Magaalada Dawlada, halkii ay ka ahaan lahayd garoon caadi ah.

Xaaladda cabsi ayaa weli ka taagan magaalada ganacsiga ee Dar-es-Salaam, kadib saddex maalmood oo dibadbaxyo doorasho ka dhashay. Dukaamo ayaa la xiray, wadooyinkuna waa faaruq, dadkuna badankoodu waxay joogeen guryahooda. Internet-ka ayaa gabi ahaanba la joojiyay tan iyo markii dibadbaxyadu bilaabmeen.

Xisbiga mucaaradka ugu weyn, Chadema, oo ka hor istaagtay tartanka, ayaa natiijada ku tilmaamay “khiyaano” wuxuuna dalbaday doorasho cusub. Xisbiga ayaa sheegay in tiro badan oo dad ah ay ku dhinteen dagaalladii ka dhacay dibadbaxyada, iyada oo boolisku adeegsadeen gaas iyo rasaas toos ah.

Xog ilo dibadeed ah ayaa u sheegay AFP in warbixino la hubo ay sheegayaan boqolaal – laga yaabee in kumanaan – inay ku dhinteen isbitaalada iyo xarumaha caafimaadka ee dalka. Qaramada Midoobay ayaa sheegtay in ugu yaraan 10 qof la dilay saddex magaalo oo waaweyn.

Si kastaba ha noqotee, Wasiirka Arrimaha Dibadda ee Tanzania, Mahmoud Thabit Kombo, ayaa diiday in xoog xad-dhaaf ah la adeegsaday, isagoo Al Jazeera u sheegay in dowladda “aysan haysan tiro rasmi ah oo muujinaysa dad ku dhintay dibadbaxyada.”

GAROWE ONLINE