Madaxweyne Ruto oo Wajir Ka Raalli-gelin Ka Bixiyey Dayacaaddii Lagu Hayey Gobolada Waqooyi Bari

Wajir, Kenya – Madaxweynaha Kenya, William Ruto, ayaa khudbaddii Madaraka Day ee sanadkan ka jeediyey magaalada Wajir ku sheegay in dowladda Kenya ay ka go’an tahay inay soo afjarto tobannaan sano oo dayac, takoor iyo horumar la’aan ah oo soo wajahday gobollada Waqooyi Bari Kenya.  

Ruto ayaa si rasmi ah uga raalli-geliyey shacabka gobolka, isagoo qiray in dowladda Kenya ay muddo dheer ku fashilantay inay si siman u gaarsiiso adeegyada aasaasiga ah sida waddooyinka, biyaha, caafimaadka iyo waxbarashada. Wuxuu sheegay in Wajir loo doortay martigelinta Madaraka Day si loo muujiyo in dhammaan shacabka Kenya ay siman yihiin.  

Madaxweynaha ayaa sidoo kale difaacay go’aankii uu ku joojiyey nidaamkii gaarka ahaa ee lagu baari jiray dadka Waqooyi Bari marka ay dalbanayaan aqoonsiyada qaranka, isagoo sheegay in dowladda aysan baabi’in xaqiijinta jinsiyadda balse ay meesha ka saartay takoorkii iyo caqabadihii lagu hayey muwaadiniinta gobolka.  

Dhanka horumarinta, Ruto wuxuu shaaciyey mashaariic ka badan 38 bilyan oo shilin Kenya ah oo laga hirgelinayo Wajir, Mandera iyo Garissa, kuwaas oo isugu jira guryo, suuqyo, iskuullo, xarumo caafimaad iyo kaabayaal kale. Wuxuu sidoo kale xusay mashruuca waddada weyn ee isku xiraysa Isiolo, Wajir iyo Mandera oo lagu qiyaasay 100 bilyan oo shilin.  

Madaxweynaha ayaa ku dhawaaqay qorshe cusub oo dhan 5 bilyan oo shilin Kenya ah oo lagu taageerayo dhaqaalaha xoolaha ee gobollada ASAL, iyadoo la diiwaangelin doono shirkado ay leeyihiin xoolo-dhaqatadu si ay uga faa’iidaystaan suuqyada iyo maalgelinta. Waxa kale oo uu sheegay in la ballaarin doono Garoonka Diyaaradaha ee Wajir iyo mashaariic kale oo waaweyn oo gobolka laga fulinayo.  

Khudbadda Ruto ayaa loo arkay mid si gaar ah diiradda u saareysa dib-u-heshiisiinta taariikhiga ah, sinnaanta muwaadiniinta iyo horumarinta gobollada Waqooyi Bari ee Kenya.  

GAROWE ONLINE