Madaxweyne Salva Kiir oo Eryay Taliyihii Ciidanka iyo Wasiirkii Maaliyadda

JUBBA - Madaxweynaha dalka Suudaanta Koonfureed Salva Kiir Mayardit ayaa wareegto madaxweyne oo laga baahiyay telefiishanka qaranka xilalkii kaga qaaday xubno muhiim ah oo ka tirsan xukuumaddiisa iyo hoggaanka ciidanka.

Salva Kiir ayaa shaqada ka eryay wasiirkii maaliyadda Salvatore Garang Mabiordit, kaas oo xilka hayay muddo aad u gaaban, wuxuuna booskiisa u magacaabay Kuol Daniel Ayulo.

Dhanka kale, madaxweynaha ayaa xilkii ka qaaday taliyihii ciidanka difaaca Janaraal Paul Nang Majok, isagoo markale xilkaas u magacaabay Janaraal Santino Deng Wol oo horay xilkan usoo qabtay.

Isku-shandhayntan oo saameysay dhowr wasaaradood ayaa ku soo aadaysa xilli dalka Suudaanta Koonfureed uu isu diyaarinayo doorashooyin dhaca dhammaadka sannadkan, isla markaana uu wajahayo caqabado dhanka dhaqaalaha iyo amniga ah.

Dalkan oo ah midka ugu da'da yar Afrika, ayaa tan iyo iyo markii ka go'ay Sudan wuxuu lugaha kula jiraa dagaalo, iyadoo Salva Kiir noqday taligii-teliye diidan xukunka inuu wareejiyo.

South Sudan ayaa weli wajahaya caqabado waaweyn oo ka hortaagan hirgelinta dhammaystirka qodobbadii ugu muhiimsanaa ee heshiiskii nabadda ee sannadkii 2018-kii, kaas oo soo afjaray dagaalkii sokeeye ee shanta sano qaatay.

GAROWE ONLINE