Ruushka oo Uganda siinaya taageero milatari oo dhan $53 milyan

KAMPALA - Ruushka ayaa Uganda u soo bandhigay taageero milatari oo qiimaheedu dhan yahay 53 milyan oo doollar, taas oo loogu talagalay in lagu xoojiyo awoodda ciidamada dalkaas. Taageeradan ayaa ka kooban qalab milatari, xarumo dayactir iyo goobo tababar oo loogu talagalay Ciidanka Difaaca Dadka Uganda (UPDF).

Madaxweynaha Uganda, Yoweri Museveni, ayaa kulamo la yeeshay wafdi Ruush ah oo uu hoggaaminayay Jeneraal Aleksandr Kshimovskii, kuwaas oo dalkaas booqday 21-kii iyo 22-kii Oktoobar. Kulamada ayaa diiradda lagu saaray iskaashiga milatari iyo sidii loo horumarin lahaa awoodda farsamo ee ciidamada Uganda.

Qorshaha taageerada waxaa ka mid ah xarun dayactir oo loogu talagalay gaadiidka iyo qalabka milatari, taas oo ku taalla Magamaga, oo u dhow magaalada Jinja. Sidoo kale, magaalada Entebbe ayaa laga hirgeliyay qalab iyo xarumo loogu talagalay amniga biyaha, halka Kalama, oo ku taalla degmada Mubende, laga sameeyay goobo tababar oo casri ah.

Qalabka lagu rakibay Entebbe waxaa ka mid ah raadaarro, doonyo, qalabka dab-damiska, gaadiid gaar ah iyo ambalaas loogu talagalay xaaladaha degdegga ah. Qalabkan ayaa la filayaa inuu sare u qaado awoodda ciidamada Uganda ee ilaalinta biyaha iyo ka jawaabista xaaladaha amni.

Madaxweyne Museveni ayaa uga mahadceliyay Ruushka taageerada uu siiyay dalkiisa, isagoo sheegay in Uganda ay doonayso inay hesho aqoon farsamo oo u saamaxda inay dayactirto qalabka milatari, isla markaana mustaqbalka ku soo saarto gudaha dalka.

Wuxuu sidoo kale carrabka ku adkeeyay muhiimadda ay leedahay in ciidamada Uganda ay la jaanqaadaan tiknoolajiyada casriga ah, oo ay ku jiraan sirdoonka macmalka ah iyo nidaamyada otomaatiga ah.

Dhankiisa, Jeneraal Kshimovskii ayaa sheegay in Ruushku uu diyaar u yahay inuu sii wado iskaashiga milatari iyo farsamo ee uu la leeyahay Uganda.

Taageeradan ayaa qeyb ka ah dadaallada Ruushku ku xoojinayo xiriirka difaaca ee uu la leeyahay dalalka Afrika, iyadoo dalal badan oo qaaradda ku yaalla ay doonayaan inay horumariyaan awoodda ciidamadooda iyo helitaanka qalab milatari oo casri ah.

GAROWE ONLINE