Xubno Daacish oo ku tababartay Soomaaliya oo Itoobiya qabatay iyagoo Qorsheynayeen Weerarro Argagixiso 

Addis Ababa – Hay’adda Sirdoonka Qaranka Itoobiya (NISS) ayaa sheegtay in ay qabteen 82 qof oo Itoobiyaan ah oo lagu tuhunsan yahay in ay qorsheynayeen weerarro argagixiso oo ay u fulinayaan kooxda Daacish (ISIS), gaar ahaan laanta kooxdaas ee ku sugan Puntland, Soomaaliya.

Dadkan ayaa lagu xiray howlgal ballaaran oo laga sameeyay 14 magaalo iyo tuulo oo ay ka mid yihiin Addis Ababa, Harar, Jigjiga, Jimma, Adama, Shashamene, Bale, iyo Silte. Sida ay sheegeen masuuliyiinta, howlgalka wuxuu ahaa mid lagu baabi’inayay shabakad xoogeysaneysa oo ISIS ka dhiseysay gudaha Itoobiya.

Warbixinta sirdoonka Itoobiya ayaa muujisay in la tuhunsan yahay in eedeysanayaasha ay tababar milatari ku qaateen Puntland ka hor inta aan loo dirin gudaha Itoobiya si ay u fuliyaan qaraxyo isku dubbaridan, ay u kiciyaan qalalaase gudaha ah, isla markaana u dhisaan xarumo qarsoodi ah oo lagu qoro xubno cusub.

NISS ayaa intaas ku dartay in caddeymo la helay intii lagu jiray howlgalka ay muujinayaan xiriir toos ah oo kooxdan ay la leedahay shabakado caalami ah oo taageero dhaqaale, agab iyo xog siinayay si loo fududeeyo weerarrada la qorsheeyay.

Hay’addu waxay sidoo kale sheegtay in kooxda ay si gaar ah u beegsaneysay masaajidda iyo goobaha diinta si ay ugu faafiyaan fikradaha xagjirka ah, dadka nugul ugu qoraan kooxda, iyo in ay isku dayaan inay bulshada kala fogaadaan.

"Shabakaddani waxay isku dayeysay in ay si qarsoodi ah uga hirgeliso gudaha Itoobiya unugyo cusub oo ay ku ballaarinayaan hawlgalka ISIS," ayay NISS ku tiri bayaan rasmi ah.

Howlgalkan ayaa noqday mid ka mid ah hawlgallada ugu ballaaran ee Itoobiya ay ka fuliso la dagaallanka ISIS, wuxuuna muujinayaa cabsi isa soo taraysa oo ku aaddan isku dayga kooxda ee ku fidinta geeska Afrika, gaar ahaan marka la eego ka dib guuldarrooyinkii kooxda ka soo gaaray dalalka Ciraaq, Suuriya, iyo Afghanistan.

Mas’uuliyiinta Itoobiya ayaa sheegaya in baaritaannada ay socdaan, islamarkaana qof kasta oo lala xiriiriyo shabakadaha xagjirka ah uu wajihi doono tallaabo sharci ah, iyadoo lagu dabaqi doono xeerarka adag ee la dagaallanka argagixisada ee dalkaasi.

Ethiopia ayaa dhawaan sare u qaaday dadaalkeeda dhinaca sirdoonka si ay uga hortagto khatarta isdhaafka ah ee ka imanaysa xuduudda Somalia, gaar ahaan deegaanka buuraleyda ah ee Puntland oo muddo dheer hoy u ahayd kooxaha xagjirka ah.

GAROWE ONLINE