5 qof oo ku dhimatay diyaarad ku bur-burtay Colombia
-
- Posted On 21-12-2016, 04:17PM
Shan qof ayaa lagu soo waramayaa inay ku dhinteen diyaarad rakaab ah oo maanta oo Arbaco ah ku burburtay bariga dalka Colombia.
Diyaarada oo ahayd Boeing 727 ayaa ku dhacday Garoonka German Olano, oo ku yaalla magaalada Puerto Carreno, oo ku dhaw xadka dalka Venezuela.
Shaqaalaha Garoonka, ayaa sheegay in Diyaaraddaasi ay la socdeen lix shaqaalaheeda katirsan, kuwaasi oo 5 kamid ah ay dhinteen, halka midka lixaad uu soo gaarey dhaawac culus.
Diyaaradda ayaa dhacday 3 Daqiiqo kadib markii ay ka duushay Garoonka Diyaaradaha German Olano, waxaana la baarayaa sababta shilkaasi sababay.
Todobaadyo kahor, 71 qof oo katirsanaa Kooxda Kubbada Cagta ee Chapecoense ee dalka Brazil, ayaa ku geeriyooday Diyaarad ku dhacday Dhul Buuralay ah, oo ku yaalla dalka Colombia.
Shilkaasi Diyaaradeed ee ka dhacay wadanka Colombia, waxaa ka badbaaday 3 Ciyaartooy, labo shaqaale iyo Suxufi, kuwaasi oo kasoo jeedo dalka Brazil.
GAROWEONLINE
