Agaasimihii warbaahinta Aqalka Cad oo shaqada laga Cayriyay
-
- Posted On 01-08-2017, 02:30AM
Madaxii warbaahinta Aqalka Cad ee looga taliyo waddanka Maraykanka ayaa shaqada laga cayriyay kadib wax ka yar Toban maalmood oo uu xafiiska joogay Anthony Scaramucci.
Mas’uulkan waxaa go’aanka shaqada looga cayriyay gaaray agaasimaha cusub ee madaxtooyada Aqalka Cad, Gen John Kelly, oo xilkaasi loo dhaariyay Isniintii.
Qoraal ka yimid Madaxtooyada ayaa lagu cadeeyay in mas'uulkan shaqada laga cayriyay kadib markii uu ku kacay tallaabooyin aan loo bogin, iyadoo warar hoose sheegayaa in arrinta xilka looga qaaday uu ka dambeeyo Madaxweynaha Maraykanka ee Donald Trump.
"Anthony Scaramucci wuu ka tagay booskii uu ka hayay Aqalka Cad ee ahaa Agaasimaha Warbaahinta, " Sidaas waxaa yiri xoghayaha Daarta Cad Sarah Huckabee Sanders.
Ma cadda in gabi ahaan uu ka tagay Aqalka Cad mudane Scaramucci iyo arrinta ku koobantahay ka qaadista xilkii uu ka hayay Madaxtooyada.
Mar laga hadlayay sababta uu agaasimaha shaqada uga eryay Madaxii warbaahinta waxaa lagu yiri, "Agaasimaha Aqalka Cad waxaan u rajaynaynaa guul, arrintan waa mid uu ku doonayo inuu ku dhiso kooxdiisa."
Sababaha shaqada looga eryay Anthony Scaramucci, ayaa wararku sheegayaan inay la xariirto hadal uu dhawaan siiyay Warbaahinta oo ay aad uga caroodeen madaxda waddankaas oo uu kamid yahay Madaxweyne Trump.
Majaladda New Yorker ayaa daabacday Khamiistii Waraysii uu bixiyay mas’uulka shaqada laga eryay taasoo uu ku aflagaadeeyay Agaasimihii hore Madaxtooyada Aqalka Cad Reince Priebus.
Haweeneyda afhayeenka u ah madaxweynaha Maraykanka Donald Trump, Sarah Sanders, ayaa sheegtay in madaxweynuhu uu u maleynayo in hadalkii uu Scaramucci u sheegay weriyaha uusan ku habbooneyn qof booskiisa oo kale jooga.
Scaramucci mudadii gaabnayd ee uu xafiiska joogay, sidoo kale waxaa shaqada ka tagay Agaasimihii madaxtooyada Aqalka Cad Reince Priebus iyo afhayeenkii Aqalka Cad Sean Spicer.
Labadaas mas’uul ayaa dhibsaday hab dhaqanka madaxii warbaahinta aqalka Cad ee hada shaqada laga cayriyay, kaasoo dhawaan bixiyay amaro tiro badan oo qaybtood loo arkayay inaysan ku haboonayn Aqalka Cad.
GAROWEONLINE
