Askar lagu dilay Howlgalka Koonfurta Philippine
-
- Posted On 10-06-2017, 05:29PM
Ugu yaraan 13 Askari oo kamid ahaa Ciidamada Marines-ka Philippine ayaa lagu diley Howlgalka ka dhanka ah Daacish, ee ka socda magaalada Marawi ee Koonfurta dalkaasi.
Afhayeenka Ciidamada Militariga Philippine Jo-Ar Herrera ayaa sheegay in askarta ay ku dhinteen dagaal mudo 16 saacadood qaatey oo ka dhacay Jimcihii magaaladaasi Marawi.
Ciidamada Mareykanka ayaa ku biiray howlgalka Marawi, oo billowday Labo Todobaad kahor, kaasi oo Ujeedkiisu yahay in laga sifeeyo magaalada dagaalyahano xiriir la leh Daacish.
Dad lagu qiyaasay 500 ilaa 1,000 oo qof ayaa ku xanniban magaalada gudaheeda, kadib markii ay Ciidamada Philippine iyo kuwa Mareykanka ay go’ddomiyeen maalmo kahor.
200 oo ruux, oo Askar ay ku jiraan ayaa ku dhintey dagaalka Marawi.
Madaxweynaha Philippine Rodrigo Duterte ayaa ku dhawaaqay May 24 Xaalad military iyo dagaal ka dhan ah Mintidiinta ku sugan Koonfurta Jaziirada Mindanao iyo Marawi.
GAROWEONLINE
