Militariga Namibia oo ‘loo waayay’ Saad iyo Cunto

Kumanaan kun oo ka tirsan militariga dalka Namibia ayaa fasax loo direy kadib markii sida la sheegay la waayay lacag loogu iibiyo raashiinka askarta loo kariyo.

Waxaa xitaa la waayay lacag lagu bixiyo biyaha, iyo korontada xerooyinka ciidanka.

Askarta hadda fasaxa ku maqan ayaa lagu wargaliyay in aysan shaqada kusoo laabanin.

Wasaaradda difaaca ayaa sheegtay in uu soo wajahay qalalaase dhaqaale kadib markii ay dowladda dhintay miisaaniyadda ciidanka ku bixi jirtay si loo yareeyo qarashka dowladda ku baxa.

Madaxweyne Hage Geingob ayaa sidoo kale saraakiisha dowladda ka mamnuucay safarada dibedda.

Madaxweynaha ayaa xitaa joojiyay isticmaalka diyaaradda gaarka ah ee madaxtooyada, isaga oo shirkii Midoowga Afrika ee dhawaan Addis Ababa ka dhacay ku aaday diyaarad shacab ah.

Waxa kale oo uu go'aansaday in uu safarada dibedda oo kaliya aado marka ay muhiim yihiin, una wato wafti aad u tiro yar.

Deynta lagu leeyahay dowladda ayaa korortay sanadihii dhawaa, iyada oo dadka maalgashadayaasha ah ay ka digeen arrintaas.