Qarax ka dhacay dalka Ciraaq
-
- Posted On 14-02-2017, 02:38PM
Ugu yaraan 4 ruux, ayaa ku dhintay, 14 kalena way ku dhaawacmeen qarax gaari oo ka dhacay koonfur galbeed magaalada Baghdad, ee caasimada dalka Ciraaq.
Saraakiisha Booliska magaalada Baghdad ayaa cadeeyay in qaraxa uu ka dhacay xaafadda Bayaa, oo ay ku badan yihiin dadka shiicada ah, iyadoo bartilmaameedkuna ahaa xarun ay leedahay dowladda Ciraaq.
Qaraxa ayaa ka dhashay gaari lagu soo xiray walxaha qarxa, oo la dhigay goob baabuurta la dhigto, oo ku taalla wado muhiim ah, oo ay adeegsadaan Mas'uuliyiinta dowladda, kuna dhaw Garoonka Diyaaradaha.
Wali ma jirto cid sheegatay mas'uuliyadda weerarka, balse inta badan qaraxyada ka dhacaya caasimada Ciraaq waxaa sheegta Ururka Daacish, oo iska difaacaya dagaal 4 bilood ka socda magaalada Mosul.
Ciidamada dowladda Ciraaq oo garab ka helaya xoogag shiico ah ayaa waxay howlgal wadajir ah kawadaan magaalooyinka ku dhaca waqooyiga dalkaasi oo gacanta ugu jiro Ururka Daacish.
GAROWEONLINE
