Qarax ka dhacay Masar iyo wararkii ugu dambeeyay Khasaaraha

Alexandria - Qarax ka dhacay magaalada Xeebta ku taalla ee Alexandria ee dalka Masar ayaa waxaa ku geeriyootay ugu yaraan 2 qof oo uu kamid yahay hal Askari oo Boolis ah.

Saraakiisha ayaa sheegay in qaraxa uu ahaa isku day la doonayay in lagu dilo madaxa amaanka magaalada Alexandria Major General Mostafa al-Nemr.

Qaraxa oo loo adeegsaday gaari walxaha qarxa lagu soo xiray ayaa waxaa lagu weeraray Kolonyo gaadiid ah oo galbinayay Major General Mostafa al-Nemr.

Major General Mostafa al-Nemr ayaa lala beegsaday qaraxa xilli uu marayay nawaaxiga Tolip Hotel ee gudaha xaafadda Rushdi oo katirsan Alexandria, oo ah magaalada labaada ee ugu weyn wadanka Masar.

Ugu yaraan afar qof oo kale ayaa ku dhaawacmay weerarka la doonayay in lagu khaarijiyo Sarkaalka katirsan Ciidamada Masar, kuwaasi oo la dhigay xaruumaha caafimaadka magaalada Alexandria.

Ma jirto cid sheegatay mas’uuliyadda qaraxa, kaasi oo lagu soo beegay xilli dhawaan Masar lagu wado inay ka dhacdo doorashada madaxtinimo.

Wasaaradda Arrimaha Gudaha Masar ayaa sheegtay in weerarka uu ahaa isku day dil oo la doonayay in lagu dilo al-Nemr, waxaana ay ku eedaysay Daacish inay ka dambayso shirqoolkaasi fashilmay.

GAROWE ONLINE