​Qarax khasaaro gaystay oo ka dhacay dalka Turkiga

Wararka kam imaanaya Bariga dalka Turkiga ayaa sheegaya in qarax xooggan ka dhacay xarun Booliis oo ku taalla magaalada Elazig, waxaana ku dhintay 6 ruux halka dhaawacu gaarayo in kabadan Labaatan Ruux.

Warbaahinta dalkaasi ayaa ku warantay in qaraxa uu fuliyay baabuur laga soo buuxiyay waxyaabaha qarxa.

Ma jirto ilaa hadda cid sheegatay mas'uuliyadda weerarkan, balse waxaa alaaba arrinta fuliya kooxaha kurdiyiinta ee dagaalka kula jira xukuumadda Ankara.

Muuqaallo laga baahiyay telefishinnada waddankaas ayaa muujinayay qiiq iyo holac qabsaday xaruntaasi booliis, waxaana dadka dhaawacmay ku jiro tiro kamid ah saraakiisha Booliiska.

Shalay gelinkii dambe ayey aheyd markii qarax ka dhacay meel ku dhow fariisin ciidan oo ku taalla isla magaalada Elazig oo ay ku dhinteen ugu yaraantii 3 qof, halka 70 kalena ay ku dhaawacmeen sida ay sheegtay warbaahinta  Turkiga.

Dhinaca kale xukuumadda Turkiga ee uu hogaamiyo madaxweyne Erdogan ayaa xabsiga ka sii daysay dad ka badan 38,000 kuwaasoo loo haystay Afgambigii dhicisoobay ee dalkaasi ka dhacay bartamihii bishii July.

GAROWEONLINE