Qofkii ugu da'da weynaa dunida oo geeriyootay [Sawirro]
-
Wariyaha Arrimaha Caalamka Garowe Online
- Posted On 22-04-2018, 11:38AM
TOKYO - Nabi Tajima, oo ahayd qofka ugu da'da weyn caalamka ayaa ku geeriyootay koonfurta wadanka Japan iyadoo 117 sano jir ah, sida ay xaqiijisay warbaahinta dalkaasi.
Buuga lagu diwaan galiyo dhacdooyinka caalamka "Guinness World Records" ayaa 2017 u aqoonsaday Nabi Tajima oo u dhalatay Japanu inay tahay qofkii ugu da’da weyn dhamaan dadka ku nool dunida.
Nabi Tajima, waxay dhalatay August 4, 1900, waxayna ku dhimatay shalay [21-ka April, 2018] Isbitaal ku yaalla Jaziiradda ay ku dhalatay ee gobolka Kagoshima, oo dhaca Koonfurta dalka Japan.
Haweenaydan ayaa 2015 noqotay qofka ugu da'da weyn dalka Japan, kahor inta aan uusan geeriyoon Violet Brown oo ahayd qofkii ugu da'da weynaa, oo kasoo jeeda Jamaica 2017 iyadoo 117 jir ah.
Japan ayaa ku caan baxay inay ku nool yihiin dadka caalamka ugu da'da weyn, iyadoo dowladda ay sheegtay in ku dhawaad 68,000 oo qof oo da'doodu ay ka weyn tahay 100 sano ay hadda ku nool yihiin wadanka.
GAROWE ONLINE
