Wasiirkii Caafimaadka Tunusia oo dhintay isagoo Ordaya
-
- Posted On 10-10-2017, 10:50AM
Wasiirkii Caafimaadka dalka Tunusia ayaa u dhintay Wadna xanuun Axaddii, isagoo ka qayb qaadanayay Orod lacag loogu aruurinayay dhismaha xarun loogu talo galay in lagu daweeyo Carruurta la nool Cudurka Kansarka.
Slim Chaker oo ahaa 56 sano jir, ayaa istaaga ka dhacay kadib markii uu Orday masaafo gaaraysa 500 Mitir. Markii dambe wuxuu ku geeriyooday Cisbitaal ay leeyihiin ciidamada Milatariga dalkaas.
Ra’isal wasaaraha dalkaas, Youssef Chahed, ayaa qoraal uu ku baahiyay bartiisa Facebook ku sheegay inuu waayay shakhsi iyo saaxiib uu dunida ku lahaa, isagoo tacsi u diray umadda reer Tunusia ee uu ka baxay.
“Waxaan waayay walaal iyo rafiiq aan lahaa, wuxuu dhintay isagoo ka shaqaynaya arrimo gargaar,” Sidaas waxaa yiri RW Youssef.
Orodka ayaa lagu qabtay magaalo Xeebeedka Nabeul.
Wasiirka dhintay Slim Chaker, ayaa la magacaabay Bishii hore kadib markii isku shaandhayn ballaaran lagu sameeyay golaha xukuumadda.
GAROWE ONLINE
