Axmed Madoobe oo Garowe imaanaya

29 November, 2015(GO)-Wararka soo gaaraya Warsidaha Garowe Online ayaa sheegaya inuu maanta Garowe imaanayo wafdi uu hogaaminayo Madaxweynaha maamulka Jubbaland Axmed Maxamed Maxamed "Madoobe".

Safarka Madoobe, ayaa la xiriira arrinta Galkacyo iyo sidii uu gacan uga gaysan lahaa nabad lagu soo dabaalo dagaallada ka dhacay 22 iyo 28 November kuwaasi oo sababay dhimasho iyo dhawac.

Axmed Madoobe ayaa sidoo kale la saadaalinayaa inuu tago magalada Galkacyo xarunta gobolka Mudug oo ah goobta dagaalku ka dhacay.

Maaha markii ugu horraysay oo wafdi ka socda Jubbaland, deegaanada Puntland u yimaadaan sidii loo soo afjari lahaa, khilaaf ama colaad taagan, waxaana dhawaan soo gaaray wafdi odoyaal dhaqameed kuwaasi oo ka qayb qaadanaya nabadaynta beelo ood-waadag ah oo ku dagaallamay gobollada Sool iyo Nugal qaybo ka mid ah.

GAROWEONLINE