Baarlamaanka PL oo ansixiyey wax ka beddelkii miisaaniyadda
-
- Posted On 08-07-2015, 02:04PM
July 8, 2015 (GO)- Baaralmmaanka Puntland ayaa maanta meel mariyey miisaaniyadda dowladdu ku shaqeyn doonto lixda bilood ee soo socota, kadib markii wax ka bedel lagu sameeyey miisaaniyaddii dowladda ee horay baarlammaanku u ansixiyey.
Sababta keentay wax ka bedelka lagu sameeyey miisaaniyadda ayaa ah kamid markii la waayey dhaqaalihii laga filayey Bankiga Adduunka oo horay miisaaniyadda loogu daray.
Gudoomiyaha Guddiga Dhaqaalaha ee Golaha Wakiilada Puntland Maxamed Faarax Nuur ayaa baarlamaanka ka hor akhriyay war bixin ku saabsan sixitaanka ay ku sameeyeen miisaaniyadda, wuxuuna sheegay in la isku jaan gooyey dakhliga iyo kharashka oo markii hore kharashku badnaa.
Intaas kadib waxaa cod loo qaaday miisaaniyadda cusub, iyadoo fadhigii baarlammaanka ee maanta ay soo xaadireen 48 mudane.
Guddoomiyaha Baarlamaanka Puntland Siciid Xasan Shire ayaa ku dhawaaqay natiijada cod bixinta, wuxuuna sheega in 46-mudane ogolaadeen, labo mudane oo keliyana ka aamuseen sidaasina ay ansax ku tahay oo lagu shaqayn karo.
Ugu dambeyntii Wasiirka Maaliyadda Puntland Cabdilaahi Shiikh Axmed oo fadhigii baarlammanka khudbad kooban ka jeediyey ayaa sheegay inay sida ugu haboon ugu shaqeyn doonaan miisaaniyadda dowladda ee lixda bilood ee soo socota.
GAROWE ONLINE
