Baarlamaanka Puntland oo ka doodey yagleelida maxkamadda dastuuriga

GAROWE, Puntland – Baarlamaanka dowlada Puntland ee Soomaaliyeed ayaa Talaadada maanta ah markii ugu horeysay 22-sano kadib wuxuu ka doodey dhameystirka iyo ansixinta xubnaha Maxkamada Dastuuriga ah.

Fadhigii maanta oo ay soo xaadireen 39 mudane waxaa u dhamaa shir-gudoonka; afhayeenka golaha, C/rashiid Yuusuf Jibriil, iyo labadiisa ku xigeen Cabdicasiis Cabdullahi Cusmaan iyo Ismaaciil Maxamed Warsame.

Dooda kadib, sharci-dejiyeyaasha oo cod qaadey ayaa 38 kamid ah waxay isku raacday in ajendaha laga dhigo qodobka ugu dambeeya ee kalfadhiga 46-aad, ma jirin cid diidey, waxaase ka aamusay hal Xildhibaan.

Maxkamadda Dastuuriga ah ayaa ka kooban sagaal xubnood oo shan kamid ah ay yihiin garsooreyaasha Maxkamadda Sarre, afarta kale waxaa min laba u soo xulaya Golaha Wakiilada iyo Xukuumada hada jirta.

Gudoomiyaha Maxkamadda Sarre ayaa hogaamin doona, waxaase ka horeysa in ay codka kalsoonida ka helaan golaha xeer-dejinta.

Yagleelida Maxkamada Dastuuriga ah oo xalin doonta khilaafyadda hay'addaha dowladda ayaa muhiim u ah nidaamka xisbiyadda badan ee Puntland ay u gudbeyso si awooda dib loogu celiyo dadweynaha.

Puntland oo la aas-aasay 1-dii August, 1998-kii ayaa bisha soo aadan u dabaalgeysa sanad-guuradii 23aad ee kasoo wareegtay markii la aas-aasay, waxayna timid xilli ay socdaan qorsheyaal lagu casriyeynayo maamulkaan.

GAROWE ONLINE