Deni oo digniin kasoo saarey kicinta dadweynaha

GAROWE, Puntland - Madaxweynaha Dowladda Puntland, Siciid Cabdullaahi Deni, oo maanta safar shaqo ku tegay Qardho ayaa tababar usoo xiray dufacadii labaad ee ciidamada Booliska Puntland ee ka qalinjebisay dugsiga Tababarka ee Xorgoble.

Madaxweynaha ayaa ugu horeyn salaan sharaf ka qaatay ciidamada tababarku u dhammaaday, kadibna wuxuu meel fagaare ah ku daawaday dhuulatus ay ciidanku soo bandhigeen oo ka turjumaya tababarkii iyo aqoontii la siiyey. Madaxweynaya ayaa bogaadiyey Ciidamada tababarka dhameystay wuxuuna kula dardaarmay in casharada iyo aqoonta lasiiyey ay ka faa'ideystaan.

Hadaljeedintiisa Madaxweynuhu wuxuu kusoo qaatay dhacdooyinka amniga lidiga ku ah iyo deganaanshaha ee ay geystaan siyaasiyiin dano kale leh, isago xasuusiyey in nidaamka Xisbiyada badan loo hirgeliyay in Siyaasiyinta kii dood qaba uu aragtidiisa ku gudbiyo.

"Waad ogtihiin Nidaamka Xisbiyada waa la furay, ninkii siyaasiyan dood qaba, waxaa loo furay Membaro ay ka hadlaan, 10 urur siyaasaded baa jira, qofkii aragti siyaasadeed qaba xor buu u yahay, laakiin waxaan marna la aqbali karin nin dhahaya waxbaan ka mudaharaadaya oo laamiyada gubaya oo baabi'inaya oo taayiro qarxinaya, oo dano kale leh, wax la aqbali karo maaha. Ciidanka Booliiska waxaa larabaa dadkaasi inay gacan ku dhigaan oo Cadaaladda horgeeyaan," ayuu yiri Deni.

Deni ayaa u digey dadka caadeystay iyagoo fulinaya dano siyaasiyiin meelo kale jooga inay kiciyaan bulshada iyagoo barasha bulshada u adeegsanaya si khaldan.

"Dadka waayadan danbe caadeystay iyagoo dano Siyaasiyiin meelo kale jooga ka fulinaya, inay dadka kiciyaan, Booliiskaan booliiskii hore waa ka duwanyahay waxaa dacwad lagugu soo oogaya meelkasta oo aad joogto oo danbi ku gashid, Facebook xitaa hadda danbi ku gashid dambi-baarayaashu waa kusoo qabanayaan, danbigu maaha kan banaanada lagu qabto keliya, haddaa Facebook-ga kacdoon, kicin, dil iyo belaayo ka shaqeysid ogow cadaaladda Puntland waa ku arkeysaa, ama Magac gabdheed Facebook-ga saarso ama mid odeyeed saarso adey kuu taalla waa lagu soo qabanaayaa," ayuu ku daray.

Xaaladda Soomaaliya ay marayso, wuxuu Madaxweynuhu sheegay in Puntland Dowlad iyo shacaba ay mar walbo u taaganyihiin sidii loo sixi lahaa nidaamka siyaaasiga ah ee Soomaaliya, iyo in loo baahanyahay in Dowladdnimada Soomaaliya wixii lagu heshiiyo la illaaliyo, sida loo illaaliyo in Puntland Doorashada Madaxweynaha la qabto 8-da January.

"Waxaan har iyo habeen u taaganahay Soomaaliya sidii loo sixi lahaa nidaamkeeda Siyaasiga ah inaan gacan ka geysano, Laakiin waxaan marna Madax iyo Shacabka reer Puntland aan suuragal ka aheyn, Wadada Soomaaliya lagu soo celinayo intii la qaloociyo la yiraahdo iska sabra dalku haadaan ha ku dhacee taas ma suuragaleyso, wixii aan u aragno iney khaldanyihiin waa sheegaynaa, waxaan rabnaa dalkan marbuu khaldamay, burbur galay, dadkiisu isnaceen, kala irdhooben, waxaan rabnaa inuu si sax ah u dhismo, mar danbe maamulka Dowladded ama kan Puntland ha ahaado ama kan Soomaaliyeed in uusan burburin," ayuu xusay.

Wuxuu ku daray: "Madaxweynayaasha Puntland waxaa la doortaa 8-da January, taasi waxay ku timi shacabka Puntland oo illaaliyey wixii lagu heshiiyey, Soomaaliya waxaa la rabaa Dowladdnimadeedana wixii heshiiska lagu yahay in lawada illaaliyo oo marxaladda hadda ee kufaa kaca ah in laga baxaa la rabaa, caqabaduhu waa imanaayaan, maxaa yeelay dal kala tegay weeye in loo dul qaataa la rabaa, waxaa la rabaa si sax in lagu saxo, waxaan aad u rajeynayaa in Soomaaliya illaahay idinkiis 2021-da isbedel wanaagsan oo loo naaloodo, oo mustaqbalka loo aayo, oo deganaasho iyo horumar horseeda inuu ka dhacaa illaahay idinkii rajeynayaa".

Munaasabadda tababarka loogu soo xiray dufcadii labaad ee Ciidamada Booliska Puntland ee ka qalinjebiyey Dugsiga tababarka ee Xergoble, waxaa ka qeybgalay Guddiga dib-u-habeynta Ciidamada, Taliyaha Ciidamada Daraawiishta Puntland, Taliyaha Ciidamada Booliska Puntland, Masuuliyiin hore usoo qabtay xilka Taliyaha Ciidamada Booliska Soomaaliya, xubno ka mid ah goleyaasha Dowladda Puntland, Maamulka Gobolka Karkaar, kan degmada Qardho iyo marti sharaf kale.

GAROWE ONLINE