Dowlada Puntland oo dhul ugu deeqday Hay'adda UNICEF
-
- Posted On 07-10-2014, 03:28PM
Garowe, October 7,2014 [GO]- Madaxwaynaha Puntland Cabdwali Cali Gaas iyo Madaxa UNICEF Somaliya Mr.Steven Lauwerier ayaa maanta dhagax dhigay xarun Hay'adda loogu deeqay oo ka danbaysay dhismaha xarunta Telefashinka dowladda (PTV).
Munaasiabdda dhagax dhiga waxaa kasoo qayb galay masuuliyiinta dowladda iyo madaxda hay'adda UNICEF, kuwaasoo u muuqday inay ku faraxsan yihiin hay'adda UN-ka inay xarumo ka samaysteen Puntland.
Maayarka magalada Garowe Mudane Cabdicasiis Nuur Cilmi Koor oo furitaankii munaasibada ka hadlay ayaa sheegay dhulkan loogu deeqay UNICEF inuu yahay mid dowladdu lee dahay isla markasna loogu talo galay in la siiyo hay'addaha wax u qabanaya dadka iyo dhulka Puntland.
Madaxwaynaha Puntland Cabdiwali Cali Gaas ayaa sheegay sababta UNICEF xaruntooda ugu wayn uga dhigatay magalada Garowe ay tahay nabadgalyadda ka jirta Puntland.
''Taa Micnaheedu waxa weeye in Garoowe ama Puntland ay noqonayso Xarun weyn oo Hay'addaha Qaramada Midoobey saldhigyo waaweyn kuleeyihiin, waxaan rajaynaynaa in Hay'addo kale oo badan oo UN-ka ah laftigooduna ku soo daba jiraan oo imaanayaan''
Mr.Steven Lauwerier oo ah masuulka UNICEF ee Somalia ayaa uga mahad celiyay madaxda Puntland sida wanaagsan ee ay ula garab taagan yihiin wada shaqayn wanaagsan oo dhexmarta, wuxuna masuulkan sheegay in xaruntan loogu shaqayn doono xaalada hooyadda iyo dhalaankeeda.
Dowladdii hore ayaa WFP iyo WHO ugu deeqday dhulal baaxadleh kuwaasoo qayb ka ah wada shaqaynta Puntland iyo UN-ka.
Hay'addaha caalamiga ah ee Somalia ayaa u muuqda kuwo fariisimo cusub ka samaysanaya deegaanadda Puntland.
GAROWE ONLINE
