Eng: Cumar Dheere oo Galkacyo lagu aasay
-
- Posted On 08-05-2016, 01:54PM
GALKACYO- Allaha u naxariistee, waxaa maanta magalada Galkacyo lagu aasay Cumar Maxamed Cabdulle (Cumar dheere), oo xalay lagu dilay xarunta gobolka Mudug.
Aaska marxuumka, waxaa kasoo qayb galay maamulka gobolka Mudug, ganacsato iyo shicibka magalaadaasi ku dhaqan, waxaana salaaddii Janaasada kadib warbaahinta la hadlay maamulka gobolka iyo culimaa'uddiinka oo sheegay inay tacsi u dirayaan ehelkii uu ka baxay Cumar Dheere.
Sheekh Mursal Shire, oo kamid ah culimaa'uddiinka Galkacyo ayaa bulshada ku booriyay inay EEBBE ku xirnaadaan islamarkaana wuxuu tacsi u diray ehelkii iyo ubadkii uu ka tagay.
Shacabka Galkacyo, ayaa arrintaasi ka hadlay waxayna sheegeen inay ka xunyihiin falalkaasi soo noq noqday ee lagu beegsanayo dadka hal doorka ah, waxayna dowladda ka codsadeen inay wax ka qabato ammaanka islamarkaana sharciga la keeno ruuxii falkaasi fuliyay.
Maamulka gobolka Mudug gaar ahaan gudoomiyaha iyo ku-xigeenkiisa ayaa ka hadlay dhacdadii xalay, waxayna shacabka ugu baaqeen in arrintii dhacday loo nisbayn qole gooni ah, balse howshaasi faraha looga qaado dowladda.
Sababta loo dilayay ayay ku sheegeen inay tahay ka shaqaynta nabadda iyo xasiloonida, wuxuuna intaasi raaciyay inay diyaar u yihiin qaabkii gacanta loogu soo dhigi lahaa dadkii ka dambeeyay falkaasi.
Xalay ayay ahayd salaaddii maqrib kadib markii Marxuum Cumar Dheere oo kasoo baxay masaajidka Salaama lagu dilay, waxaana falka toogashada fuliyay nin dhalinyaro ah bastoolad ku hubaysnaa.
GAROWEONLINE
