Farole oo tacsi u direy ehelka Fiqi Bashiir
-
- Posted On 15-07-2017, 05:29PM
GAROWE, Puntland- Cabdiraxmaan Sheekh Maxamed Maxamud Farole oo ah Xildhibaan katirsan Aqalka Sare ee Barlamanka Somalia, ayaa tacsi u direy ehelka Marxuum Fiqi Bashiir oo kamid ahaa Isimada Puntland kaasoo maanta lagu aasay gobolka Mudug.
Farole oo la hadlayay Radio Garowe, ayaa Marxuumka ALLE uga baryay inuu ugu deeqo naxariistiisa waasaca ah, halka qoyskiisana EEBBE u weydiiyay Samir inuu ka siiyo Fiqiga oo uu ku tilmaamay shakhsi qiimo ku dhex lahaa bulshada Somaliyeed.
“Waxaan jeclahay inaan tacsi ka diro Geerida ku timid Fiqi Bashiir Cabdulle Cusmaan oo ahaa Madax dhaqameed iyo Mutacallim, waxaa rabaa inaan tacsidan gaarsiiyo Qoyskiisii, asxaabtiisii iyo umadda Somaliyeed ee uu ka baxay marxuumku,” Ayuu yiri Farole.
Xildhibaan Cabdiraxmaan Sheekh Maxamed, ayaa xusay in marxuumka ay muddo soo ahaayeen rafiiq islamarkaana ku sifeeyay shakhsi bulshada Somaliyeed wax u soo qabtay.
“Waxaan ALLE uga baryayaa inuu u naxariisto, wuxuu ahaa Shakhsi wax u qabtay bulshada Somaliyeed,” Ayuu hadalkiisa ku daray Farole.
Fiqi Bashiir Cabdulle Cusmaan, ayaa maanta la keenay Maydkiisa magaalada Galkacyo, waxaana lagu aasay isla magaaladaas iyadoo uu ka qayb galay Madaxweynaha Puntland iyo xubno katirsan golayaasha dowladda.
GAROWEONLINE
