Gollaha Wakiillada Puntland oo Xubinimo ka qaaday Cabdirashiid Yuusuf Jibriil

Garoowe, Talaado, 15 Luulyo 2025 – Golaha Wakiillada Dowladda Puntland ayaa fadhigii maanta si aqlabiyad leh ku ansixiyay aqbalaadda luminta xubinnimada Golaha ee Xildhibaan Cabdirashiid Yuusuf Jibriil.

Codbixinta Golaha ayaa u dhacday sidatan:

38 Xildhibaan ayaa oggolaaday
1 Xildhibaan ayaa diiday
4 Xildhibaan ayaa ka aamusay

Go’aankan ayaa ka dhigan in Xildhibaan Cabdirashiid Yuusuf Jibriil si rasmi ah uga baxay xubinnimada Golaha Wakiillada Puntland, iyada oo aan la faahfaahin sababta rasmiga ah ee keentay luminta xubinnimada.

13-kii bishan, Xeerilaaliyaha Guud ee Dowladda Puntland ayaa amar bixiyey in la soo xiro Cabdirashid Yuusuf Jibriil, Guddoomiyihii hore ee Baarlamaanka Puntland ahna Xildhibaan ka tirsan Aqalka Wakiillada Puntland.

Cabdirashid, oo dhowaan dib ugu soo noqday Puntland, ayaa lagu eedeeyey inuu khatar geliyey amniga guud ee Puntland iyo inuu ku xadgudbay qodobbada 221, 223 iyo 233 ee Xeerka Ciqaabta Soomaaliyeed (X.C.S).

Sidoo kale, wararka ayaa sheegaya in uu damacsanaa in gobolka Sanaag ka kaxeeyo ergooyin ka qaybgalka shirweynaha Laascaanood ee lagu dhisayo maamulka Khaatumo.

Cabdirashid, oo sida la rumeysan yahay ka warqabay amarada lagu soo qabanayo, ayaa maanta inta aan la furin shirweynaha Laascaanood si lama filaan ah ugu dhawaaqay iska casilaaddiisa xildhibaanimo ee Puntland.

GAROWE ONLINE