Guddoonka baarlamaanka oo lagu soo dhaweeyay Garowe

MUQDISHO, Soomaaliya - Guddoonka labada aqal ee baarlamaanka federaalka Soomaaliya ayaa Sabtida maanta ah waxaa lagu soo dhaweeyay magaaladda Garowe.

Madaxweyne Saciid Cabdullahi Deni oo wafdiga kaga hortegay garoonka diyaaradaha magaala madaxda ayaa soo dhaweeyay. Cabdi Xaashi iyo Maxamed Mursal.

Mas'uuliyiinta ayaa, sidda ay xoguhu muujinayaan, waxay ka qeybgalayaan Madasha Doodaha Heritage ka dhacaysa caasimadda dowladda Puntland.

Qoraal kasoo baxay xafiiska Cabdi Xaashi ayaa lagu yiri "Madaxweynaha DG Puntland ayaa Garowe kusoo dhoweeyay Guddoomiyaha Aqalka Sare Md Cabdi Xaashi iyo wafdiga uu hogaaminayay oo goordhow gaaray Garowe, si ay uga qeyb-galaan madasha Afkaar-wadaag ee uu soo qaban-qaabiyay Machadka The Heritage Institute for Policy Studies".

Madaxtooyadda Puntland ayaa dhankeeda tiri: "Madaxweynaha Dowladda Puntland Mudane Siciid Cabdullaahi Deni, ayaa Garoonka diyaaradaha ee Gen Maxamed Abshir Airport Garoowe kusoo dhoweeyay Guddoomiyaha Aqalka Sare Mudane Cabdi Xaashi iyo Wafdi uu hoggaaminayo".

Ajendaha madasha ayaa lagu sheegay "2025 Sidee looga bixi karaa Kumeel Gaarnimada iska socota? Waxaana diiradda lagu saari doonaa Xasilinta Dalka amni ahaan, Dhameystirka Dastuurka, Qabashada Doorasho qof iyo cod ah Yagleelida Nidaam Federaal oo shaqeynaya".

Madasha waxaa ka qeybgalaya madaxda qaar ka mid ah dowlad Goboleedyada, Guddoonka Labada aqal ee Baarlamaanka, inta badan Midowga Musharaxiinta Madaxweynaha, Xildhibaano labada Gole iyo Marti sharaf kale.

Machadka Heritage ayaa inta badan wuxuu ka faalooda siyaasadda, isaga oo soo saara warbixino falanqeyn ah taasoo ku saabsan xaaladaha culus ee waddanka jira.

GAROWE ONLINE