Hoggaamiyihii Al-qaacidada Yemen oo duqeyn lagu diley

June 16, 2015 (GO)- Al-qaacidada dalka Yemen ayaa xaqiijisey in duqeyn dhacday dhowr maalmood kahor lagu diley hoggaamiyehoodii Nasir al-Wuhayshi.

Farriin muuqaal ah oo maanta oo Talaado ah lagu baahiyey shabakadaha internetka ayaa lagu sheegay in al-Wuheyshi lagu diley duqeyn ay fulisey diyaarad bilaa duuliye ah oo Jimcihii lasoo dhaafay ka dhacday magaalada Mukallah ee gobolka Xadru-mowt.

Muuqaalka waxaa sidoo kale lagu sheegay in xilkaas si kumeel gaar ah loogu soo magacaabay Qaasim al-Riimi. Ninkan ayaa  horay usoo noqday ku-xigeenka hoggaamiyaha guud ee al-Qaacida, Ayman al-Tawahiri.

Dhanka kale, af-hayeen u hadlay Wasaaradda Gaashaan-dhigga ee Dowladda Maraykanka ayaa xaqiijiyey in duqeyntaas iyagu fuliyeen laguna diley hoggaamiyihii al-Qaacidada Yemen iyo afar qof oo kale.

GAROWE ONLINE+Aljazeera