Idaacadda VOA-da oo Puntland laga joojiyay

28 Octobar, 2015(GO)-Qoraal saaka ka soo baxay wasaaradda warfaafinta Puntland, ayaa lagu joojiyay shaqada Idaacadda VOA-da ka hayso deeganada Puntland.

Qoraalka ayaa lagu xusay in laanta Afka Somaliga VOA-da baahisay warar aan sal iyo raad lahayn, kuwaasi oo dhaawac u gaysanaya sumcadda iyo dowladnimada Puntland.

Idaacadaha FM-yada ah ee baahiya ayaa lagu amray inay joojiyaan tabinteeda inta eedaymaha VOA-da loo gudbinayo Maxkamdda, waxaana Gudoomiyaasha gobollada iyo taliyaasha la faray inay xil iska saaraan hawshaasi.

Lama oga sababta rasmiga ah ee loo joojiyay shaqada Idaacadda fadhigeedu yahay Maraykan-ka, balse waxaa loo malaynayaa inay la xiriirtu warbixin ka hadlaysa su'aalihii Barlamanka Puntland weydiyeen Madaxweyne Gaas iyo is-casilaada Gudoomiyihii Barlamanka Puntland Siciid Xasan Shire.

Ilaa hadda ma jiro wax war ah oo ka soo baxay maamulka Idaacadda VOA-da.

GAROWEONLINE