Labaatan qof oo ku dhintay dagaalkii ka dhacay Saaxdheer
-
- Posted On 28-08-2014, 09:53PM
Garowe,Puntland August.28 [GAROWEONLINE]- Ugu yaraan labaatan qof ayaa ku dhintay dad ka badana sodan qofna way ku dhaawacmeen ka dib dagaal saaka Saaxdheer ku dhexmaray ciidamada Somaliland iyo kuwa mamulka Khaatumo.
Warsidaha GO wararku uu caawa ka helayo Saaxdheer ayaa tibaaxaya xaaladu inay deggan tahay walow dadka dagaalkaasi ku dhintayna lagu sheegay inay yihiin dhinacyadii dagaalamay.
Madaxda ugu saraysa Puntland wax hadal ha kama soo saarin xaalada Saaxdheer oo wali kacsan iyadoona masuuliyiinta Khaatumo u carareen dhanka Itoobiya.
Shirka gollaha wasiiradda Puntland oo dhagta loo taagayay maantadii hore ayaa looga hadlay socdaalkii madaxwayne Gaas ee Itoobiya iyo arrimaha amaanka Puntland.
Daahir Maxamed Maxamuud oo sheegtay inuu ka mid ahaa dadkii wax ka qaban qaabinayay xaflada caleemo saarka madaxda Khaatumo ayaa sheegay weerarka Saaxdheer lagu soo qaaday inay iska kaashadeen Puntland iyo Somaliland.
Madaxwaynaha Khaatumo Cali Khaliif Galayr oo ilaa iyo hada aan la hayn meel uu ku sugan yahay wali kama soo hadlin weerarka Somaliland kusoo qaaday Saaxdheer.
Taliyaha ciidanka Somaliland Shaqale oo warbaahita la hadlay ayaa sheegay sababta ay weerarka usoo qaadeen inay tahay hub laga soo dhiibay Muqdisho iyo Kismaayo oo lasoo gaarsiiyay Buuhoodle.
Saaxdheer ayaa magalada Laascaanood u jirta 74-km halka magalada Garowe lagu sheegay inay u jirto 200-km.
GAROWEONLINE
