Madaxweyne Deni oo soo dhoweeyay Golaha Mucaaradka ee Muqdisho laga dhawaaqay

GAROWE – Madaxweynaha Puntland, Siciid Cabdullaahi Deni, ayaa si diirran u soo dhoweeyay golaha mucaaradka ee dhowaan Muqdisho laga iclaamiyay, kaasoo uu hoggaaminayo madaxweynihii hore ee Soomaaliya, Sheekh Shariif Sheekh Axmed.

Isagoo ka hadlayay furitaanka kalfadhiga cusub ee Baarlamaanka Puntland, Madaxweyne Deni ayaa muujiyay taageeradiisa mabda’a uu golahaasi ku dhisan yahay, gaar ahaan sida uu uga go’an yahay dhowrista Dastuurka Federaalka — arrin uu sheegay in Puntland mar walba ay u taagneyd.

“Waxaan soo dhoweeyaa Golaha Mucaaradka iyo mabda’a uu ku saleysan yahay ee ah ilaalinta Dastuurka Federaalka, taasoo ah arrin Puntland mar walba ay horumarsaneyd,” ayuu yiri Madaxweyne Deni.

Golahan mucaaradka ayaa la dhisay horraantii bishan xilli ay cirka isku sii shareerayaan khilaafaadka siyaasadeed ee Soomaaliya, iyadoo siyaasiyiin badan ay ku baaqayaan in si dhab ah loogu dhaqmo Dastuurka iyo in la helo hannaan siyaasadeed oo loo dhan yahay.

GAROWE ONLINE