Magaalada Bosaso oo maanta si weyn looga ciiday
-
- Posted On 04-10-2014, 11:40AM
October 4, 2014 (GO)- Iyadoo maanta oo ku beegan 10-ka bisha Dul-xijjah muslimiinta caalamaka daafihiisa ku noolina u dabbaal degayaan munaasabadda Ciidul Adxa, ayaa waxaa si weyn looga ciiday guud ahaan deegaanada Puntland gaar ahaan magaalada Bosaso ee xarunta gobolka Bari.
Maamulka gobolka Bari, kan degmada Bosaso, wasiirro iyo saraakiisha ciidamada ammaanka qaar kamid ah ayaa salaadii ciidka boqollaal dadweyne ah kula tukaday garoonka kubadda cagta.
Goobta waxaa laga jeediyey khudbado u badnaa baraarujin iyo in lays xasuusiyey Alle-ka-cabsiga, waxaa sidoo kale dhammaan dadkii goobta ka hadlay ku celceliyeen nabadgelyada iyo sida ay muhiim u tahay in loo xoojiyo.
Dhanka kale ammaanka magaalada Bosaso ayaa maanta si aad ah loo adkeeyey, waxaana dhammaan jidadka muhiimka ah ku sugnaa ciidamada booliska oo baarayey dadka iyo gaadiidka.
Inkastoo cimilada Boosaaso weli kulushahay, waxay hadana saaka magaaladu ku waabariisatay jewi aad u deggen cirkuna daruuro badan lahaa.
GAROWE ONLINE
