Mas'uuliyiin ka tirsan Somaliland oo lagu xiray gobolka Sanaag
-
- Posted On 18-10-2015, 06:50PM
18 Octobar, 2015(GO)-Ciidamo taabacsan Puntland, ayaa maanta ka kaxaysta tuulada Yubbe oo 50-km bari ka xigta magaalada Ceerigaabo ee gobolka Sanaag, mas'uuliyiin ka tirsan maamulka Somaliland.
Dadka la kaxaystay, waxay deegaanka u yimaadeen wacyigalin ku saabsan doorashada maamulka Somaliland.
Guddoomiyihii gudiga doorashooyinka Somaliland ee gobolka Sanaag Axmed Cali Biixi, xildhibaan Qamar Taleex oo ka tirsan golaha deegaanka degmada Ceerigaabo iyo shan kale oo laba yihiin darawallada laba gaari ee ay wateen madaxdaasi ayaa la sheegay in loo kaxaystay degmada Badhan ee isla gobolkaasi.
Gudoomiyaha Sanaag ugu magacaaban Somaliland Axmed Cabdi Fly ayaa BBC-da u sheegay mas'uuliyiintaasi lageeyay magalada Baran ee isla gobolkaasi.
Xildhibaan Qamar Taleex ayaa xoriyadeeda dib u heshay, waxayna laanta Afka Somaliga ee BBC-da u sheegtay in odoyaasha deegaanku wadaan sidii loo soo dayn lahaa mas'uuliyiinta ka xiran.
Arrintan ayaa loo malaynayaa inay xiriir la leedahay muranka dhanka deegaanka ee u dhaxeeya maamullada Puntland iyo Somaliland.
Ilaa hadda ma jirto wax war ah oo ka soo baxay dhinaca Puntland.
GAROWEONLINE
