Puntland: Dhismaha goleyaal degaan oo dib loo dhigay

Wasaaradda arrimaha gudaha ayaa xustey in dib-u-dhacan ay salka ku hayso "arrimo farsamo" wallow aysan fahfaahin.

MUQDISHO, Soomaaliya - Dowladda Puntland ayaa ku dhawaaqdey in dib loo dhigay dhismaha Goleyaasha Deegaanka Degmooyinka Ufeyn, Eyl iyo Qardho oo ku qorshaysnaa 27ka January 2022.

Wasaaradda arrimaha gudaha oo war-saxaafadeed soo saartey ayaa shaaca ka dhigtey in dib-u-dhacan ay salka ku hayso "arrimo farsamo" wallow aysan bixin tafaasiil dheeraad ah.

"Wasaaradda Arrimaha Gudaha, Federaalka iyo Dimuqraadiyeynta Dowladda Puntland waxay dhammaan inta ay quseyso ka raaligelinaysaa in Wasaaraddu go'aan ku gaartay in aan dib u dhigno dhismaha Goleyaasha Deegaanka Degmooyinka Ufeyn, Eyl iyo Qardho oo ku qorshaysnaa 27ka January 2022 si aan u dhammeyno hawlo farsamo oo ay tahay in la qabto ka hor inta aan la fariisinta Goleyaasha Deegaanka ee ku yimid doorashadii 25kii October 2021," ayay tiri.

Qoraalka waxay raacisay: "Waxaan mar labaad ka cudur daaranaynaa dib u dhaca ku yimid dhismaha Degmooyinka kor ku xusan. Wasaaradda ayaana dib ka soo sheegi doonta wakhtiga la qabanayo InshaAllaah".

Horaantii bishan Janaayo sanadka cusub ee 2022-ka ayay ahayd markii wasaaradda arrimaha guduhu ay muddeysay dhismaha goleyaasha degaanka iyo doorashadda guddoomiyaasha degmooyinka.

GAROWE ONLINE