Puntland: Goobo cod-bixin iyo diiwaan-gelin oo la asteeyay

GAROWE, Puntland – Guddiga ku meelgaarka ah ee doorashooyinka Puntland ayaa Axada maanta ah wuxuu soo bandhigay Seejooyinka iyo Goobaha Diiwaangelinta Codbixiyayaaasha Degmooyinka Qardho, Eyl iyo Uffeyn.

Sidda ku xusan qoraal kasoo baxay guddiga kaasoo lagu faafiyey ciwaanadda uu ku leeyahay baraha bulshadda, baahintan waxay ka dambeysay ka gedaal markii uu guddiga shalay si wadar ogol ah u meelmariyey goobahaas.

Puntland ayaa isku diyaarineysa in doorashooyinka dowladaha hoose iyo baarlamaanka ay ku gasho nidaamka xisbiyada badan kaasoo ay kaga gudbeyso nidaamka awood qeybsiga beelaha oo ay ku dhaqmeysay sanadihii dambe.

Kadib marka labadaas doorasho ay ku qabsoomaan habka qof iyo cod, waxaa lagu waddaa in madaxweynaha uu ku yimaado coddeynta dadka shacabka ah.

Hadii uu hirgalo barnaamijkan oo qeyb ka ah dimuqraadiyeynta, Puntland ayaa noqoneysa maamulkii ugu horeeyay ee qeybta ka ah federaalka Soomaaliya ee ku guuleysta qabashada qof iyo cod oo dowladda federaalka ay ku fashilantey.

Iyadda oo horey kaalin weyn uga cayaartay in nidaamka federaalka uu ku baaho guud ahaan Soomaaliya, haddana Puntland ayaa mar kale waxay qarka u saaran tahay in ay horboodo nidaamka xisbiyada badan oo curdun ka ah Soomaaliya.

Maadaama dhaqaalo fara badan uu ku baxayo hirgelinta barnaamijkan, meesha kama marna taakulada deeq-bixiyeyaasha caalamiga ah, balse waxaa barbar socda miisaaniyad gaar ah oo xukuumadda Puntland ay u qoondeysay.

Hoos ka akhriso qoraalka guddiga

GAROWE ONLINE