Puntland oo beenisay in ay cagaf-cagaf ka heshay dowladda federaalka

Tani ayaa waxay muujineysaa in mashruucan lagu marin-habaabiyo bulshada Soomaaliyeed.

GAROWE, Puntland - Wasaaradda Beeraha iyo Waraabka Dowladda Puntland waxay si rasmi ah u beenisay inay wax ka ogtahay iibka iyo habraaca loo maray labada (2) cagaf-cagaf ee saambada beeraha ah oo Wasaaradda Beeraha iyo Waraabka DFS ay shalay ku sheegtay inay loogu talagalay beeraleyda Degmada Iskushuban ee Puntland.

Wasaaradda Beeraha iyo Waraabka Dowladda Puntland ayaa tilmaamtay in aysan la soo wadaagin wax macluumaad ah oo ku saabsan mashruuca SCRP ee Bangiga Adduunka.

Tani waxay muujineysaa in mashruucan lagu marin-habaabiyo bulshada iyadoo lagu xadgudbayo nidaamka federaalka ee ku saleysan Dastuurka Ku-Meel Gaarka ah ee 2012.

Wasaaradda waxay si adag ugu baaqday Wasaaradda Beeraha iyo Waraabka DFS inay raacdo nidaamka sharciyeysan, ayna latashi iyo wada-xaajood la sameyso Dawladaha xubnaha ka ah Dowladda Federaalka, gaar ahaan arrimaha kaalmada iyo mashaariicda horumarineed ee lagu taageerayo beeraleyda.

Waxaan ugu baaqeynaa dhammaan dhinacyada kala duwan ee ay khuseyso inay meel uga soo wada-jeestaan hab-dhaqanka khaldan ee lagu siyaasadeeyo mashaariicda horumarineed.

GAROWE ONLINE