Puntland oo ganafka ku dhufatay warar laga faafiyey dekada Boosaaso

GAROWE, Puntland – Dowlada Puntland ayaa warar aan sal iyo baar lahayn waxay ku tilmaamtay in ay muddo 30-casho ah xiran tahay dekada magaalada Boosaaso, xarunta gobolka Bari.

Wasiiradda Dekadaha, Ganacsiga iyo Kalluumeysiga oo warbaahinta kula hadlay Garowe ayaa Talaadada maanta ah meesha ka saarey "wararkaas been abuurka ah ee saxaafadu tabisay".

Mas'uuliyiinta ayaa sidoo kale ganafka ku dhuftay warbixinada tibaaxaya in la joojiyey doonyihii ganacsiga ee dekada Boosaaso.

Faarax Cawaashe, wasiirka kalluumeysiga iyo kheyraadka Puntland, ayaa caddeeyay in kaliya xayiraadda lasoo rogay ay saameyneyso doonyaha ganacsiga ee ka yimaada dibadda.

"Ganacsigii waa furan yahay, dekadiina waa u furan tahay doonyaha ganacsiga gudaha, kuwa la mamnuucay waa doonyihii ganacsiga ee ka imaanayey dibadda," ayuu raaciyey wasiirku.

Kadib shir ay yeesheen wasiiradda 7-dii bishaan Maaj, 2020, Puntland ayaa si ku meel gaar ah u hakisay doonyaha ka yimaada dibadda, talaabadaas oo la xiriirta fayruska Corona.

Balse xayiraadaas ayaanan saameyn ku lahayn marsadda Boosaaso oo kamid ah kaabeyaasha dhaqaalaha ee ugu muhiimsan Puntland isla markaana ay kusoo xirtaan maraakiib badan.

Iyaddoo Soomaaliya laga xaqiijiyey hal kiis, doonyaha kalluumeysiga ee ku xirta dekadaha Puntland ayaa badi ka yimaada Iran oo kamid ah wadamada uu sidda daran u aafeeyay COVID-19.

GAROWE ONLINE