Puntland: Qarax lagu fashiliyay magaalada Bosaso
-
- Posted On 18-09-2017, 07:29PM
BOSASO, Puntland- Qarax Jugtiisa laga maglay guud ahaan magaalada Bosaso ayaa galabta ka dhacay xarunta gobolka Bari, kaasoo la dhigay goob aad u mashquul badan oo inta badan lag raaco baabuurta loo yaqaano PL-ka ee inta badan dadweynuhu isticmaalaan.
Wararka ayaa sheegaya in ciidamada Booliisku ka war heleen qaraxan oo lagusoo qariyay daasad ka hor intuusan iskiis u qarxin sida ay GO u sheegeen saraakiil xog ogaal ah.
Booliiska ayaa ku wargaliyay qaybta qaabilsan Miino baarista inay hubiyaan weelka lagusoo qariyay miinadan, waxaana ay u xaqiijiyeen inay tahay waxyaabaha qarxa.
Hubin kadib ciidamada Booliiska gobolka Bari ayaa ku guulaystay inay xiraan nawaaxiga aaga Qaraxa la dhigay iyagoo shacabka uga digay inay usoo dhawaadaan.
Qaraxan ayaa dhacay Galabta goor gaaban, mana jirto wax khasaaro ah uu dhaliyay.
Sarkaal katirsan ciidamada Booliiska oo la hadlayay Warsidaha Garowe Online ayaa sheegaya in ciidamadu dedaal dheer ku bixiyeen sidii looga hortagi lahaa khasaaro kooxaha dhagax qabayaasha ah la doonayeen shacabka Bosaso.
Arrintan ayaa timid xilli Madaxweyne Gaas ku suganyahay magaalada Bosaso.
Dhowr jeer oo hore qarax ay gaysteen kooxaha Daacish iyo Shabaab ayaa ka dhacay xarunta gobolka Bari.
Amniga ayaa aad loo adkeeyay caawa, waxaana socda baaritaano xooggan.
Ilaa hadda lama oga cidda qaraxa dhigtay goobtaas, balse waxaa lagu tuhmayaa mintidiinta ku sugan gobolka Bari ee xiriirka la leh Daacish iyo Al Qacida.
GAROWEONLINE
