Ra'iisul Wasaare Rooble oo gaarey Garowe

GAROWE, Puntland - Madaxweynaha Dowladda Puntland Mudane Siciid Cabdullaahi Deni, ayaa garoonka diyaaradaha ee Garowe kusoo dhoweeyay Ra’iisal Wasaaraha Dowladda Federaalka ah ee Soomaaliya Mudane Maxamed Xuseen Rooble.

Soo dhoweynta waxaa Madaxweynaha ku weheliyay Madaxweyne Ku-xigeenka Dowladda Puntland Mudane Axmed Cilmi Cismaan Karaash, Guddoomiye Ku-xigeenka koowad iyo Guddoomiye Ku-xigeenka Labaad ee Golaha Wakiilada Mudane Abuukaate Cabdicasiis Cabdullaahi Cismaan iyo Mudane Ismaaciil Maxamed Warsame, Goleyaasha Dowladda Puntland, Saraakiisha Ciidamada, Maamulka Gobolka iyo kan degmada iyo qeybaha kala duwan ee Bulshada Garowe.

Rooble ayaa kulankiisu daaran yahay ismariwaaga ka taagan qabashada doorashada la filayey iney la dhacdo dalka Soomaaliya bilaha December, January iyo February.

Wasiirka Kowaad oo muddo kooban hayay xilkaan ayaa kulan asbuucii la soo dhaafey magalaada Muqdisho Dowlada Federaalka, maamulada Somalia iyo beesha caalamka kaga dhawaaqey inuu booqasho ku tagayo magaalo madaxyada qaar ka tirsan dowladaha xubnaha ka ah dowlada Federaalka. 

GAROWE ONLINE