Ra'isal Wasaare Sharmaarke oo Galkacayo ku wajahan
-
- Posted On 19-07-2015, 05:51AM
July 19, 2015 (GO)- Ra'isal Wasaaraha Dowladda Federaalka Cumar Cabdirashiid Cali Sharmaarke oo maalmihii u dambeeyey ku sugnaa magaaada Garowe ayaa lagu wadaa inuu saaka u ambabaxo magaalada Gaalkacayo ee xarunta gobolka Mudug.
Muddo kooban ayey Ra'isa Wasaaraha iyo wafdigiisu Galkacayo ku sugnaan doonaan, iyagoo uga sii gudbi doona dhanka magaalada Muqdisho.
Diyaar garow xooggan oo ku aaddan soo dhoweynta wafdigaas ayaa xilligan Gaalkacayo ka socda, iyadoo ammaankana si weyn loo adkeeyey.
Madaxweynaha Jubaland Axmed Maxamed Islaan (Axmed Madoobe) ayaa isagana la filayaa inuu maanta dhanka magaalada Kismaayo u dhoofo.
Booqashada Mudane Sharmaarke Galkacayo ku tegayo ayaa noqoneysa tii ugu horreysey tan iyo markii uu xilka qabtey, waxayna kusoo aadeysaa xilli uu natiijo la'aan kusoo dhammaadey kulan saddex geesood ahaa oo Garowe ay ku yeesheen Dowladda Federaalka, Puntland iyo Jubaland.
Madaxweynaha Puntland Cabdiweli Maxamed Cali Gaas oo hadda magaalada Nairobi ku sugan, ayaa shalay si kedis ah Garowe uga dhoofay xilli shirar xasaasi ahi socdeen. Wararka qaar ayaa sheegaya in Madaxweynuhu ku wargelin safarkiisa mas'uuliyiinta kale ee uu Garowe kulammada kula lahaa.
GAROWE ONLINE
