Roobabka Guga oo ka curtey Puntland
-
- Posted On 23-03-2015, 09:13AM
March 23, 2015 (GO)- Roobabka Guga ayaa ka curtey qaybo kamid ah deegaanada Puntland gaar ahaan gobollada Bari, Karkaar, Nugaal iyo Sanaag.
Meelaha roobabka xooggani ka da'een waxaa kamid ah dhulka miyiga ah ee hoos taga degmooyinka Carmo, Isku-shuban iyo Boosaaso.
Waxaa sidoo kale roobab lagu diirsadey ay ka da'een qaybo kamid ah gobollada Nugaal iyo Mudug.
Gobolka Haylaan qaybo kamid ah iyo galbeedka Sanaag ayaa iyagana roobab mahiigaan ahi ku hooreen labadii maalmood ee lasoo dhaafey.
Dhanka kale, waxaa jira khasaare maaliyadeed oo ka dhashay roobab saddexdii maalmood ee ugu dambeeyey si xiriir ah uga da'ayey Puntland.
In ka badan lix boqol oo neef oo ari ah ayaa lagu soo warramayaa in roobku ku diley deegaano hoos taga degmada Isku-shuban ee gobolka Karkaar, sida uu xaqiijiyey duqa Isku-shuban Cabdirisaaq Muuse Cartan.
Curashada xilli roobaadka Guga ayaa kusoo aadeysa xilli weli ay abaari ka jirto qaybo kamid ah gobollada dhexe iyo koonfurta dalka.
GAROWE ONLINE
