Saraakiil kasocotay NATO oo shir ku yeeshay Bosaso
-
- Posted On 19-11-2016, 07:02PM
BOSASO, Puntland- Saraakiil kasocota Midowga Yurub gaar ahaan howlgalka NATO, ayaa maanta la kulmay wasiirka Dekedaha, Gaadiidka Badda iyo La dagaallanka Bur-cad badeeda Puntland oo ay weheliyaan, maamulka gobolka iyo odoyaasha dhaqanka.
Kulanka ayaa muddo kooban ka socday xarunta wasaaradda, waxaana diiradda lagu saaray sidii la isaga kaashan lahaa yaraynta tacadiyada loo gaysto Kalluumasatada ku dhaqan xeebaha iyo sidii looga hortagi lahaa in Puntland kusoo lagu arko Falalkii burcadda.
Labada dhinac ayaa is-weydaarsaday afkaaro la xiriira sida howshaas lagu amba qaadi karo iyo doorka Midowga Yurub kaga aadan arrimaha ka taagan biyaha Somalia gaar ahaan Puntland.
Markii uu shirkaas soo idlaaday ayaa wasiir Siciid Maxamed Raage, wuxuu sheegay inay isku afgarteen labada dhinac sidii loo sii amba qaadi lahaa arrimaha badda iyo la dagaallanka burcadda, isagoo xusay inuu ahaa shir muhiim ah oo labada dhinacba diiradda saareen iskaashiga.
Sarkaal u hadlay Midowga Yurub, ayaa isna sheegay inay ka go'antahay taageerada Puntland, wuxuuna xusay inay door muhiim ah siinayaa ilaalinta biyaha Somalia.
Intii kulankan socday, waxaana magaalada Bosaso gaar ahaan Dekedda lagu arkayay Diyaarado dul heehaaba iyo laashashka dheereeye oo ay saaranyihiin ciidamo Ajnabi ah.
Maaha markii kulanka caynkan oo kale ah uu ka dhaco magaalada Bosaso, balse wuxuu kusoo aaday xilli jariif xoog leh lagu hayo biyaha Puntland iyadoo kalluumaysato ka cabayaan maraakiib shisheeye.
GAROWEONLINE
