Soomaaliya: Madaxweynaha Jubbaland Axmed Madoobe oo la kulmay dhiggiisa Puntland 

GAROWE – Madaxweynaha Jubbaland Axmed Maxamed Islaam (Axmed Madoobe) ayaa shalay gaaray magaalada Garowe, oo wadahadal kula yeeshay dhigiisa Puntland, Siciid Cabdullaahi Deni, iyadoo socdaalkiisu uu kusoo beegmay xilli ay taagan tahay hubanti la’aan siyaasadeed oo la xiriirta isbeddelka dastuurka dalka Soomaaliya.

Labada hoggaamiye ayaa si cad uga soo horjeestay habka hoggaamineed ee madaxweyne Xasan Sheekh Maxamuud, iyagoo ku eedeeyay inuu si kaligiis ah u beddelayo dastuurka si uu danihiisa ugu adeegto. Madoobe iyo Deni ayaa sidoo kale si adag uga soo horjeeda qorshaha doorasho qof iyo cod ah.

Axmed Madoobe ayaa si diirran loogu soo dhaweeyay garoonka diyaaradaha ee Garowe, halkaasoo uu ku qaabilay madaxweyne Deni iyo wafdi uu hoggaaminayo, kaddibna waxaa loo galbiyay madaxtooyada si ay wadahadallo gaar ah u yeeshaan. Inkasta oo aysan weli si rasmi ah u shaacin waxyaabaha laga wada hadlayo, hadana arrimaha siyaasadda ayaa la filayaa inay xoogga saaraan, iyadoo amniga iyo horumarinta la rumeysan yahay inay qayb ka yihiin ajandaha.

Labada hoggaamiye ayaa isku dayaya inay dib u hagaajiyaan xiriirkooda siyaasadeed, kaasoo xumaaday tan iyo sanadkii 2022, kadib markii Axmed Madoobe uu taageeray Xasan Sheekh Maxamuud intii lagu jiray doorashadii madaxweynaha, taasoo Deni uu kaalinta saddexaad ka galay.

Tan iyo markaas, labada mas’uul ayaa hadda si cad uga soo horjeestay Madaxweyne Xasan Sheekh Maxamuud, waxaana suuragal ah inay sameystaan isbaheysi cusub oo siyaasadeed si ay ula tartamaan xisbigii dhowaan la aas-aasay ee Justice and Solidarity Party, kaasoo ay ku mideysan yihiin dhammaan madaxda dowlad-goboleedyada kale marka laga reebo Deni iyo Madoobe.

Sannadkan horraantiisii, Axmed Madoobe iyo Xasan Sheekh ayaa mar kale is khilaafay, taasoo keentay in ciidamo gaar ah oo Turki ah laga soo diray Muqdisho laguna dagaallamo deegaanka El-Wak, halkaasoo ciidamada Jubbaland ay ku jebiyeen ciidamadaasi. Ciidamadii laga keenay Muqdisho ayaa ugu dambeyn laga soo badbaadiyay xuduudka Kenya, halkaasoo ay ku sugnaayeen ciidamo ka tirsan xoogga difaaca Kenya.

Xasan Sheekh ayaa dadaal ugu jira sidii loo qaban lahaa doorashooyin toos ah oo qof iyo cod ah sannadka 2026, hase yeeshee labada hoggaamiye iyo mucaaradka ayaa si cad uga hor yimid qorshahaas, iyagoo ku tilmaamay in ay tahay xeelad lagu kordhinayo muddada xilheynta Xasan Sheekh. Waxay sidoo kale sheegeen in Soomaaliya aysan weli haysanin kaabayaashii lagama maarmaanka u ahaa qabashada doorashooyin toos ah sababo la xiriira amni darro iyo hanjabaadaha Al-Shabaab.

War-saxaafadeed ay labada mas’uul soo saari doonaan ayaa la filayaa in uu faahfaahin ka bixin doono nuxurka wadahadalladooda. Sidoo kale, waxaa la hadal hayaa in Siciid Deni uu mar kale isu sharaxi karo xilka madaxweynaha Soomaaliya marka doorashada dhacdo sannadka dambe, iyadoo ay sii xoogeysanayso mucaaradnimada loo hayo Madaxweyne Xasan Sheekh.

GAROWE ONLINE