Trump oo Xaqiijiyay Duqeymo ka Dhacay Gobolka Bari ee Puntland

WASHINGTON - Madaxweynaha Mareykanka Donald Trump ayaa xaqiijiyay in duqeymo milatari la fuliyay Sabtidii, kuwaasoo lagu beegsaday xubno ka tirsan ururka ISIS ee ku sugan gobolka Bari. Trump ayaa sheegay in duqeymahaasi si gaar ah loo bartilmaameedsaday weerar-qorsheeye sare oo ka tirsan ISIS, kaasoo muddo dheer ku dhuumaalaystay godad ku yaalla buuraha Puntland.

Isagoo aan shaacin magacyada xubnaha la beegsaday, Trump ayaa sheegay in duqeymahaasi ay burburiyeen godadkii ay ku jireen, iyada oo la dilay xubno badan oo ka tirsan ururka argagixisada, si kastaba ha ahaatee, dadka rayidka ah ma aysan waxyeello ka soo gaarin howlgalkaas.

"Subaxnimadii, waxaan amray duqeymo milatari oo si sax ah u beegsanaya qorsheeyaha weerarada ee ISIS iyo xubno kale oo uu soo reebay iyo kuwa uu hoggaaminayo gudaha Soomaaliya. Dhalinyaradan, oo aan ku helnay iyagoo ku dhuumaalaysanaya godad, waxay khatar ku ahaayeen Mareykanka iyo xulafadeena," ayuu yiri Trump oo qoraal ku daabacay barta Truth Social.

Trump ayaa sidoo kale sheegay in duqeymaha ay burburiyeen godadkii ay ku jireen, isla markaana lagu dilay argagixiso badan iyadoo aan wax dhib ah ay ka soo gaarin dadweynaha rayidka ah. "Farriinta aan u dirayno ISIS iyo dhammaan kuwa ka shaqeeya weerarada Mareykanka waa in 'WAA IDIN HELI DOONAA, WAA IDIN DILAYN DOONAA'," ayuu intaas ku daray.

Madaxweynaha Mareykanka ayaa sidoo kale eedeeyay madaxweynaha hore ee Mareykanka, Joe Biden, in uusan si degdeg ah uga hortagin ISIS gudaha Soomaaliya. "Ciidamadeennu waxay bartilmaameedsadeen qorsheeyaha weerarka ee ISIS muddo sanado ah, laakiin Biden iyo saaxiibadiis ma aysan si degdeg ah uga jawaabin. Anigu waan sameeyay!" ayuu yiri Trump.

Xoghayaha Gaashaandhigga Mareykanka, Pete Hegseth, ayaa xaqiijiyay in duqeymahaasi ay ka dhaceen xarumaha ciidamada Mareykanka ee Afrika, iyadoo dowladda Soomaaliya ay ka masuul ahayd isku xirka howlgalka.

Pentagon-ka ayaa xaqiijiyay in duqeymaha ay dileen xubno badan oo ka tirsan ISIS, iyadoo aanay jirin wax dhaawac ah oo ka soo gaaray dadweynaha. Xogta Pentagon ayaa sidoo kale la jaanqaadaysa qiimeynta Trump.

Ilaha ku sugan gudaha Soomaaliya ayaa xaqiijiyay in duqeymo kala duwan ay ka dhaceen buuraha Al-Miskaad ee gobolka Bari, iyadoo saameyn xooggan ay ku yeelatay deegaannada Qurac, Buqo, Wangable iyo Dhasaan, kuwaasoo ay muddooyinkan dagaal ka socdeen ciidamada Puntland oo ay taageerayaan bulshada deegaanka.

Muddo bil ah, ciidamada ammaanka Puntland ayaa kordhiyay howlgalladooda ka dhanka ah ururka ISIS, iyagoo isku dayaya inay burburiyaan saldhigyada ururka ee ku dhex yaalla dhulka buuraha ah ee gobolka Bari. Dowladda Soomaaliya ayaa hore u muujisay welwel ku aaddan awoodda ururka ISIS, iyagoo sheegay in haddii aan wax laga qaban, ay kooxda sii fidi karto gudaha Soomaaliya.

Madaxweynaha Puntland Siciid Cabdalhi Dani ayaa aad loogu aaamney talaabadaan uu qaadey taas oo ciidamada Puntland qaadeen weeraro ka dhan ah kooxaha argagixsada ku dhuumaaleysanaya buuraha Cal -Miskaad 

GAROWE ONLINE