Wasiirka Warfaafinta oo isimadda Puntland ku tilmaamay “Dimuqraadiyad diid”
-
GAROWE ONLINE XAFIISKA MUQDISHO
- Posted On 02-11-2023, 03:03PM
GAROWE, Soomaaliya - Wasiirka Warfaafinta Puntland Maxamuud Caydiid Dirir ayaa sheegay in shirka Isimada oo koobanaa garab taageersan mucaaradka oo kaliya.
Tani waa jawaabtii ugu horeysay oo toos ah oo ay bixiso dowladda uu hogaamiyo Madaxweynaha dhawaan xilka ka degayo Saciid Cabdullahi Deni.
Wasiirka ayaa sheegay in ay jiraan Hay’ado ku shaqo leh Doorashada sida Guddiga Doorashada lagu muransanyahay ee PEC, Baarlamaanka iyo maxkamadda Dastuuriga ah.
Wasiirku waxa uu sheegay in Isimada aanay waxba kaga duwanayn dadka kale, isla markaana uu go’aankoodu yahay aragti.
"Isimmada ma noqon karaan Marjic, waxay sidaas ahaayeen markii Puntland la dhisayey, maanta Baarlamaan baan leenahay."
Wasiirku ayaa Isimmada dusha ka saaray cawaaqib xumada ka dhalan karta go’aamadii ay soo saareen sida uu hadalka u dhigay, isagoo carabka ku dhuftay inay sii wadi doonaan hanaanka doorasho ee muranka ka taaganyahay.
GAROWE ONLINE
