Xiriirka kubadda Kolayga Puntland oo la shaaciyay

08 Octobar, 2015(GO)-Shir jara'id oo maanta ku qabtay Garowe Agaasimaha guud ee wasaaradda dhalinyarada iyo cayaaraha Puntland Axmed Cabdalla Tigaana ayuu ku shaaciyay 7 xubnood oo loo magacaabay xiriirka kubadda kolayga Puntland.

Tigaana ayaa sheegay in xubnahaasi lagu magacaabay waraaq ka soo baxday xafiiska wasiirka wasaaradda shaqada, shaqaalaha, dhalinyarada iyo cayaaraha Puntland.

Xubnahan ayuu sheegay in ka qayb qaadan doonaan sidii loo hormarin lahaa kubadda Kolayga Puntland, waxaana maamulka gobolada ee dhanka ciyaaraha ka codsaday inay soo xulaan cayaaryahanadii matali lahaa gobol walba.

Magacaabista ayuu sheegay Agaasimuhu in wadatashi laga yeeshay, waxaana uu xusay in dhawaan la qaban doono ciyaaraha heerka koowaad ee Puntland.

Waxa uu soo hadal qaaday qabashada koobka Goboladda Puntland,waloow uusan xusin xilliga la qaban doono.

GAROWEONLINE