Ajendayaasha Kalfadhiga 7aad ee Golaha Shacabka oo laga shirayo

MUQDISHO, Soomaaliya – Guddiga joogtadda ah ee Golaha Shacabka baarlamaanka federaalka ah ee Soomaaliya ayaa lagu waramay in uu maanta kulan ku yeelanayo xarunta Villa Hargeysa ee Muqdisho.

Xubnaha guddiga oo saacadihii lasoo dhaafay fariimo loogu diray telefoonadooda gacanta ayaa lagu wargeliyey in ay soo xaadirkaan kulanka.

War qoraal ah oo kasoo baxay guddoonka Aqalka Hoose ayaa waxaa lagu caddeeyay in ajendaha shirkaas lagu lafa guri doono.

"Kulanka guddiga joogtada ah ayaa waxa ay kaga hadli doonaan dejinta Ajendayaasha Kalfadhiga 7aad ee Golaha Shacabka ee uu 6dii bisha furay Madaxweynaha Jamhuuriyadda Federaalka Soomaaliya Mudane mohamed Abdullahi Mohamed Farmaajo," ayaa la yiri.

Shirkan oo dhamaadkiisa laga soo saarayo war-saxaafadeed ayaa la filayaa in lagu dejiyo qaababka ay u kala horeyn doonan ajendeyaasha kalfadhigan oo ah midka ugu dambeeya uu yeelanayo golaha.

Ajendayaasha aadka isha loogu hayo isla markaana la filayo in labada aqal ka doodaan waxaa kamid ah doorashooyinka, dastuurka, dhismaha golaha adeega garsoorka iyo qaar kale oo quseeya coddeynta.

Siyaasiyiinta ayaa rumeysan in golaha uusan ku guuleysan karin meelmarinta dhamaan ajendayaasha horyaala, iyagoo ku doodaya ahmiyadda ay leeyihiin iyo sidda ay ugu baahan yihiin "doodo furan".

Guddoonka iyo baarlamaanka Soomaaliya ayaa lagu eedeeyay in uu ku dhex-milay laanta fulinta isla markaana badi xubnaha sharci-dejinta ay ka tirsan yihiin xukuumadda, taas oo laashay isla xisaabtanka.

GAROWE ONLINE