Baaris lagu bilaabay weerarkii ka dhex-dhacay xabsiga Muqdisho

Dowladda Soomaaliya ayaa Guddi ka kooban sideed xubnood u saartay in ay baaritaanno ku sameeyaan sidda uu u dhacay weerarkaas.

MUQDISHO, Soomaaliya - Taliyaha xabsiga dhexe ee Soomaaliya Daahir Cabdulle Raage ayaa shaqada laga joojiyey kadib isku daygii baxsashada maxaabiista Shabaab ee dhacay 13-kii bishan July.

Dowladda Soomaaliya ayaa Guddi ka kooban sideed xubnood u saartay in ay baaritaanno ku sameeyaan sidda uu u dhacay weerarkaas.

Jeneraal Maxamed Xuseen Axmed ayaa ah ku simaha taliyaha xabsiga, waxaana uu hoggaamin doonaa baaritaanka, sidda lagu sheegay qoraal kasoo baxay Dowladda.

Waajibka guddiga waxaa ka mid ah ogaanshaha habacsanaanta amniga, qiimeynta jawaabta laga bixinayo isku daygii baxsashadda xabsiga, iyo soo jeedinta tallaabooyinka looga hortagayo shilalka mustaqbalka.

Si kastaba, shaqo joojinta ayaa imaanaysa iyadoo dowladda federaalka ay sheegtay inay doonayso inay xoojiso ammaanka xabsiga ayna xaqiijiso isla xisaabtanka lagu maareynayo maxaabiista halista ku ah.

GAROWE ONLINE