Ciidamo gadood ka sameeyay magaalo uu booqdey Laftagareen

BAYDHABO, Koonfur Galbeed – Boqolaal ciidamo ah ayaa maanta oo Arbaco ah gadood ka sameeyey magaalada Diinsoor ee gobolka Baay xili uu halkaas ku sugan yahay madaxweynaha Koonfur Galbeed.

Cabdicasiis Xasan Maxamed [Laftagareen] ayaa magaaladaas u tegay caleema saarka gudoomiye cusub oo ay dhowaan doorteen Golaha Degaanka.

Illo degaanka ah ayaa u sheegay warsidaha Garowe Online in askarta gadoodey ay hakiyeen isu socodka gaadiidka iyo ganacsiga magaalada.

Kahor inta aysan magaalada soo gelin, Laftagareen ayaa balanqaadey in uu kala xaajoon doono tabashooyinka mushar la'aanta. Balse, hogaamiyaha waxaa tilmaamay in uu ku guuldareystay arrintaas.

Ciidamada gadoodka sameeyay oo lagu tababaray gudaha magaalada ayaa tiradooda waxay gaareysaa 500, sidda uu GO fahansan yahay.

Diinsoor ayaa waxay kamid tahay magaalooyinka maamul goboleedka xaruntiisu tahay Baraawe ee go'doonka ugu jira maleeyshiyaadka gacansaarka la leh shabakada argagixisadda ah ee Al-Qaacida.

Sikastaba, mushahar la'aanta ay ka cabanayaan ciidamada ayaa timid xili maamulka uu horey u shaaciyey in askarta uu si joogto ah u siiyo gunadooda, balse tani waxay meesha ka saareysaa sheegashadaas.

GAROWE ONLINE