Cirro: “Danaha Somaliland ayaan u shaqeynayaa, ma aha Falastiin”

Hargeysa – Madaxweynaha Somaliland, Abdirahman Mohamed Abdullahi Irro, ayaa difaacay go’aanka maamulkiisa uu safaarad uga furtay magaalada Qudus isla markaana uu xiriir diblomaasiyadeed buuxa ula yeeshay Israel, isagoo si adag uga jawaabay dhaleeceyn uga timid qaar ka mid ah dalalka Islaamka iyo xisbiga mucaaradka ah ee KAAH.

Isagoo ka hadlayay magaalada Hargeisa, Cirro wuxuu sheegay in safaaradda laga furay Galbeedka Quddus, oo uu ku tilmaamay dhul ay dalal badan u aqoonsan yihiin inuu ka tirsan yahay Israel.

“Maanan loo dooran inaan u shaqeeyo Falastiin, waxaa la ii doortay inaan u shaqeeyo danaha Somaliland,” ayuu yiri Madaxweynaha.

Cirro wuxuu sheegay in Somaliland aysan wax dhibaato ah u geysan Falastiin, isla markaana ay taageersan tahay xaqa shacabka Falastiin ay u leeyihiin inay go'aansadaan mustaqbalkooda.

Madaxweynaha ayaa xusay in Somaliland ay muddo 35 sano ah raadineysay aqoonsi iyo taageero caalami ah, oo ay ku jiraan dalalka Islaamka, balse aysan helin jawaab ay ku qanacdo.

Wuxuu sheegay in inkastoo Somaliland ay tahay bulsho Muslim ah oo xiriir walaaltinimo la leh dunida Islaamka, haddana aysan jirin waddan Islaami ah oo aqoonsaday jiritaankeeda.

Cirro wuxuu intaas ku daray in Israel ay noqotay dowladdii ugu horreeyay ee aqoonsata Somaliland, taasoo horseedday in labada dhinac yeeshaan xiriir diblomaasiyadeed oo buuxa.

“Waxaan saaxiib la nahay waddankii na aqoonsaday. Diblomaasiyaddu waxay ku dhisan tahay is-weydaarsi. Markii Israel na aqoonsatay, annaguna waan aqoonsannay,” ayuu yiri.

Wuxuu sidoo kale sheegay in qaar ka mid ah dalalka Islaamka ay ka horyimaadeen tallaabooyinka diblomaasiyadeed ee Somaliland, oo ay ka mid yihiin magacaabista safiir iyo furitaanka safaaradda Jerusalem.

Isagoo farriin u diraya dalalka Islaamka ayuu yiri: “Waxaan leenahay walaalayaal, waan idiin baahanahay, idinkuna walaalaheen baad tihiin. Haddii aadan na arki karin, ugu yaraan faraha naga qaada.”

Hadalka Cirro ayaa yimid kadib markii xisbiga mucaaradka ee KAAH uu sheegay inuu taageersan yahay xiriirka Israel iyo aqoonsiga ay siisay Somaliland, balse uu kasoo horjeedo in safaaradda laga furo Qudus, isagoo ku dooday in tallaabadaasi ay ka hor imaneyso dastuurka Somaliland, sharciga caalamiga ah iyo Axdiga Qaramada Midoobay.

Ugu dambeyn, Cirro wuxuu ugu baaqay xisbiyada siyaasadda iyo dhammaan daneeyayaasha Somaliland inay mideeyaan dadaallada lagu raadinayo aqoonsi caalami ah, isagoo sheegay in arrintaasi ay tahay dan qaran oo ka sarreysa khilaafaadka siyaasadeed.

GAROWE ONLINE