Dagaal Beeleed khasaare dhashay oo ka dhacay Degmada Jalalaqsi iyo Maamulka Hirshabelle oo ku baxay

Jowhar — Ugu yaraan afar qof ayaa ku dhintay iska horimaad ka dhacay degmada Jalalaqsi ee gobolka Hiiraan, ka dib markii uu khilaaf u dhexeeyay labo qoys uu isu beddelay gacan-ka-hadal beeleed, sida uu Jimcihii sheegay Wasiirka Arrimaha Gudaha ee Hirshabelle.

Cabdiraxmaan Daahir Guure, Wasiirka Arrimaha Gudaha ee Hirshabelle, ayaa wareysi uu siiyay warbaahinta ku xaqiijiyay in ciidamada amniga iyo maamulka degmada ay ku bixi doonaan sidii loo joojin lahaa dhiigga ku daadanaya halkaas, loona soo celin lahaa deegaanka xasiloonidiisa.

"Waa labo qoys oo deegaanka wada deggan, khilaafkooduna wuxuu ka dhashay arrimo la xiriira dhalinyaro wiilal iyo gabdhaha ah," ayuu yiri Wasiir Guure. "Waxay ahayd in arrintan loo maro waddada sharciga ah, balse xaaladda ayaa faraha ka baxday oo xumaatay." Wasiirka ayaa intaas ku daray in ciidamada amniga iyo mas'uuliyiinta deegaanka ay ku guuleysteen inay kala dhex galaan labada dhinac ee iska soo horjeeda.

Wasiir Guure ayaa sidoo kale xaqiijiyay in labo guri lagu gubay rabshadahaas, balse dabka la demiyay, iyadoo la xiray dadkii lagu eedeeyay inay ku lug lahaayeen falkaas.

Wuxuu si kulul u cambaareeyay gubista guryaha iyo baahinta sawirrada rabshadaha wata ee lagu baahinayo baraha bulshada, isagoo sheegay inay arrimahaas ka horimanayaan qiyamka iyo hiddaha suuban ee bulshada Soomaaliyeed.

Wasiirka ayaa ugu baaqay odayaasha dhaqanka, culimada diinta, dhalinyarada iyo aqoonisbadanka deegaanka inay gacan ka geystaan qaboojinta xiisadda, ayna taageeraan dadaallada nabadeynta ee socda.

Ugu dambeyntii, Guure wuxuu xusay in maamulka Hirshabelle iyo Dowladda Federaalka Soomaaliya ay tallaabo sharci ah ka qaadi doonaan qof kasta oo lagu helo inuu hurinayo rabshadaha ama hortaagan dadaallada dib u heshiisiinta ee hadda ka socda gobolka.

GAROWE ONLINE