Farmaajo oo laamaha amniga faray "feejignaan" kadib weerarkii Kismaayo

MUQDISHO, Soomaaliya - Madaxweyne Maxamed Cabdullaahi Farmaajo ayaa tacsi u diray qoysaska iyo ehellada muwaadiniinta Soomaaliyeed ee ku naf waayey weerarkii argagixisanimo ee ka dhacay magaalada Kismaayo.

Madaxweynaha ayaa u rajeeyey bukaanada in uu Alle u boogo dhayo, isagoona Xukuumadda ku jiheeyay in si degdeg ah ay gurmad caafimaad ugu fidiso dadka ay culus tahay xaaladdooda caafimaad.

"Innaa Lillaahi wa innaa Ilayhi raajicuun. Weerarkan argagixisanimo ee ka dhacay magaalada Kismaayo waxa uu muujinayaa yoolka cadawga dadka Soomaaliyeed oo salka ku haya in ay meel kasta ku gumaadaan haldoorkeenna iyo guud ahaan dadkeenna".

Farmaajo oo weerarka ku tilmaamay "mid arxan daro ah" ayaa faray hay’adaha ammaanka heer Federaal ee ku sugan Jubbaland iyo kuwa heer dowlad Goboleed in ay sare u qaadan feejignaantooda oo ay sugaan amniga.

"[Waa in ay] ka hor tagaan falalka bahalnimada ah ee argagixisadu ay ku doonayaan in ay ku wax-yeelleeyaan amniga Jubbaland," ayaa lagu yiri bayaa kasoo baxay xafiska Farmaajo.

Hogaamiyaha dalka ayaa ugu baaqay bulshada Jubbaland in ay xoojiyaan midnimadooda iyo wadajirkooda, siina joogteeyaan la shaqeynta laamaha ammaanka, si loo xaqiijiyo amniga guud ee deegaannada oo ay ku soo food leedahay doorashada Madaxtinimo ee Jubbaland.

Kooxda gacansaarka la leh Al-Qaacida ee Al-Shabaab ayaa dusha saaratay mas'uuliyadda dhacdadan oo illaa iyo haatan la hubiyey in ay ku dhinteen ku dhowaad tobban ruux.

Dadka la khaarijiyey ayaa waxaa kamid ah shaqsiyaad caan ah oo ay ku jiraan gabar wariye ahayd iyo seygeeda oo Wasiir kasoo noqdey maamulka Jubbaland. [Halkan ka akhriso]

GAROWE ONLINE